Aizawl: Social Welfare Minister Dr. K. Beichhua chuan nimin khan Saikao khuaa sap missionary hmunpui humhalhna tur a enfiah.
Dr K Beichhua hian Saikao khuaa sap missionary hmunpui humhalhna tur project, Preservation of Cultural Heritage, Saikao kalpui dan tur a enfiah a. He project atan hian Ministry of Tribal Affairs atanginRs. nuai 560 hmuh a ni.
Saikao khawtlangin an lo hmuahnaah Dr. K. Beichhua chuan thu sawiin, thangtharten an lo hriat reng atan sap missionary te sulhnu chu humhalh ngai a tih thu leh a thil ngaih pawimawh berte zinga mi a nih thu a sawi a. Kum 2020-ah Mizoram atanga project an theh luh zingah pahnih chauh Ministry of Tribal Affairs-in an lo pawmpui zingah a tel chu lawmawm a tih thu a sawi.
Social Welfare Minister hian SEDP atanga sorkarin hma a lo lak tawhte tar langin, “SEDP PWD Line Department hnuaiah inkalpawhna kawngpui siam that hna nasa tak thawh tawh a ni a. Education Department hnuaiah zirtirtu indaih lohna phuhruk nan SEDP kaltlangin zirtirtu thahnem tak lak a ni tawh bawk,” a ti.