India rama Covid-19 tuar na ber, Maharashtra chuan Pathiannia Marathi New Year lo thleng tur a\ang chiahin hripui avanga an inkhuahkhirhna zawng zawng an hlip tawh dawn.
Hmai erawh tuam turin inngen a ni a; mahse, tih ngei ngei ngai erawh a ni tawh dawn lo tih state sorkar chuan a sawi.
Hripui avanga inkhuahkhirhna hlih vek tur hi Ningani khan Chief Minister Uddhav Thackeray-a pisa chuan a puang a ni.
“Maharashtra-a COVID inkhuahkhirhna zawng zawng chu kumin kum thar, Gudi Padwa-ah hlih vek a ni ang,” tiin chief minister pisa chuan Twitter-ah an tih dan \hin anga Marathi leh Konkani Hindu kum thar lawmna atan puan a ni.
Inkhuahkhirhna hlih vek tur hi kum hnih dawn hnuah niin chief minister hova cabinet \hukhawm chuan hlih turin thu an titlu niin state Health Minister Rajesh Tope chuan thuthar lakhawmtute a hrilh.
Maharashtra-ah hian ni khata Covid kai hi mi 100 bawr vel chauh ni tawhin thihpui pawh an tlem hle tawh a, thi awm loh ni pawh a awm fo tawh.
Thawh\anni tlai thleng khan hri kai enkawl lai pawh mi 964 chauh an awm tawh a. Yavatmal, Washim leh Hingoli district-ah phei chuan enkawl lai an awm tawh lo hial.
Kum 2020-a hripui a len \an a\ang khan he state-ah hian hri kai mi 78,73,619 hmuh tawh an ni a, mi 1,47,780 zetin an thihpui tawh bawk tih health department chuan a sawi.
Maharashtra chauh ni lovin, tun hnai thla hnih vel chhungin India ram pumah Covid kai hmuh zat hi a tlem tawh hle a. Darkar 24 liam ta chhung pawh khan hri kai mi 1,225 chauh hmuh an ni.
Hri kai enkawl lai hi mi 14,307 an la awm mek a. Darkar 24 liam ta chhungin mi 28 thihpui awmin mi 5,21,129-in an thihpui tawh a. Hri kai hi mi 4,30,24,440 zet an awm tawh a ni.
Maharashtra hi hri leng thawh khatna leh thawh hnihna tuar na tak niin inkhuahkhirhna pawh khauh taka kalpui niin an state-a kûtpui lian ber, nikuma Ganesh Chaturthi an lawm dawn a\ang khan punkhawm lian tham phal loh a ni a. Police pawhin dan bawhchhiate chu na takin an hrem zel.