Auto Corner
by Ruata
Renault India chuan an compact SUV mawi tak mai Kiger chu a chi thar, 2022 model an tichhuak leh ta a. Rs. Nuai 5.84 (ex-showroom) man atangin a intan dawn a ni.
Renault India hian tunhnai lawk, March ni 14-ah khan an lirthei pakhat, Kwid chu kum 2022 model an lo tichhuak tawh bawk a. Hei hi a man tlemin a hma aiin a rawn to a, hetiang chiah hian an compact SUV Kiger thar pawh hi a hma aiin tlemin a man hi a to ve bawk a ni.
2022 Renault Kiger thar chu
2022 Renault Kiger hian a pawn lamah rawng thar a nei a, hei bakah hian hmanraw thar hrang hrang a nei a ni. Kiger tharah hian a rawng lamah chuan dual tone metal mustard paint scheme a nei thar a, a chunglam chu a dum a ni thung a ni. 2022 Renault Kiger hian a hmalamah skid plate a nei tawh a, hei bakah hian a tailgate-ah chrome-a chei a ni ang a, body decal thar pawh a nei a. He compact SUV hian 16 inch wheel a nei tawh bawk a ni.
A chhunglamah hian 2022 Kiger hian variant zawng zawng, a man tlawm ber atanga a to berah boruak tihthianghlimna, air purifier a awm vek a. Renault hian a dashboard bawr hi rawng senin an rawn chei thar a, a tlang theuhah la senin a inthui vek bawk a, an rawn ti mawi viau a ni. A seat lamah pawh quilted design seat kan hmu bawk a ni.
A khawl lamah chuan 2022 Kiger-ah hian khawl chi hnih 1.0 litre 3 cylinder naturally-aspirated petrol leh 1.0-litre 3-cylinder turbocharged petrol te duhthlan tur a awm a. A pangngai (naturally-aspirated petrol) hian 71bhp power leh 96Nm torque a pechhuak thei a, turbo zawk hian 99bhp power leh 160Nm torque a pechhuak thei thung a ni. Transmission lamah chuan 5-speed manual leh CVT automatic te duhthlan tur a awm a ni.
Renault hian hmain he lirthei variant hrang hrangah hian RXT (O) trim an tichhuak a, chutah chuan a khawlah 1.0 litre naturally aspirated petrol khawl a hmang a. He trim-ah hian tunah chuan 1.0 litre turbocharged petrol khawl a awm tawh dawn a, manual leh CVT gearbox te duhthlan tur a awm tawh bawk.
A elpui
Tunhnaiah Renault Kiger elpui leh unau ang te pawha sawi theih Nissan Magnite hian leitu a nei tam hle a. Kiger hi a rawn khum rih a ni. Renault Kiger leh Nissan Magnite hi Chennai bula Oragadam-a Renault leh Nissan tangkawpin an din manufacturing plant-ah siamchhuah ve ve a ni a. An siamchhuahna hmun a inan mai bakah hian platform inang Renault-Nissan Alliance’s CMF-A modular platform an hmang ve ve a, an khawl hman pawh a inang ve ve a ni. Heng lirthei pahnihte hi compact SUV to lo tak, mawi bawk si, tha bawk si an ni ve ve a ni. Nissan Magnite bakah hian market-a compact SUV kan neih hrang hrangte pawh Kiger thar hian a rawn el zui zel dawn bawk a ni.
India ramah hian compact SUV huanga lirtheite hi market lamah an che tha chho viau a. Mizoramah pawh hian lirthei man to hret lei tum te hian car to leh khan hniam tak lei ai chuan compact SUV hrang hrangte hi an thlang ta zawk em ni tihturin a pung chak hle a, India ram pum ang pawhin lirthei hralh kal hoah hian compact SUV mai bakah midsize SUV te pawh an rawn lang chho mek zel a, SUV lam kan awn ta viau mai. Hetiang a nih laia man tlawm leh man man zawka SUV huang lirthei tha tak mai Renault Kiger leh a tlukpuite a lo awm hian leitu a hmu tam zel turah a ngaih theih.