Afghanistan sorkar hotute chuan kar hmasa atanga Covid-19 laka invenna damdawi an pek \an mekah China chuan an damdawi siam, Sinopharm dose 400,000 lai a pe dawn tih an puang.
“Kabul-a China ram palai chuan damdawi lama thawktute nena an inkawmnaah an ramin Afghanistan hnenah vaccine dose 400,000 a pek tur thu hi a sawi,” tiin health ministry-a immunisation programme hotu, Ghulam Dastagir Nazari chuan nimin khan Reuters news agency hnenah a sawi.
China ramin a siam, Sinopharm vaccine hi World Health Organization pawhin hman tura a pawm tawh niin an dawn hun tur tak erawh sawi theih a la ni lo niin Nazari chuan a sawi.
Afghanistan-ah hian an province neih 34-a damdawi ina thawk mi 12,000 hnenah invenna hi pek a ni tawh tih a sawi.
Hotu lian dang pakhat chuan venhim hnathawktute hnena invenna pek pawh an kalpui \an tawh niin a bawk.
Afghan sorkar hian United States kaihhruaia Qatar khawpui, Doha-a Taliban nen inremna zawnga September a\anga inbiakna an kalpui mek lai a ni a, hetih chhung hian an ram chhungah tharum thawhna a thleng nasa hle.
Taliban chuan heng thil thlengah hian an inhnamhnawih lo niin an insawi a. Sorkarin invenna pek a kalpui mek pawh an thlawp tih an sawi.
Afghanistan hian India hnen a\angin Oxford-AstraZeneca damdawi dose 500,000 a dawng a, heimi hmang hian Thawhlehni kal ta a\ang khan invenna pek runpui hi an kalpui ve mek.