Hnam Inpumkhatna Bus tlan ngei mawlh teh se
Transport Minister hoin Hnam Inpumkhatna Bus thlantir dan tur ngaihtuahin tlawmngai pawl hrang hrangte an inhmukhawm a, Vanghmun, Zampui tlang, Tripura-a an inhmuhkhawmna hian rah tha a chhuah chhoh ngei pawh beisei teh ang.
Sorkar na an chan tirh atangin Zofate awm tamna khawpui hrang hrangah Bus tlantir tum a nih thu transport minister in a lo sawi tawh a, hri leng avangtein duh anga hna an thawh chak theih loh hnuah tunah thuthar lo awm leh ta hi a lawmawm hle mai a, a hlawhtlinna hmuh thuai a chakawm hle.
Minister hian, Tripura leh Mizoram inkara MST bus tlantir tur hian harsatna hrang hrang karah theihtawp an chhuah mek zel tih sawiin, “Hmun hrang hranga nationalist-te kan phur tlang a, pheikhai rual taka ke penpui atan chhak, thlang, chhim leh hmara Zofate sawmin, Pathian zarah a hlawhtlin ngei a rin tlat thu a sawi a; inrawnkhawmnaah hian CYMA, MZP, MSU leh ZORO Thalai hruaitute pawh an tel ve bawk.
He ruahmanna hi a tha hle a, inrelbawlna hran hnuaia duh reng vang ni lova awm kan unaute tam tak tan Aizawl a hnaih phah dawn bakah, chet vel a tiawlsam hle dawn bawk a, ruahmanna hrang hrang siamsaah te pawh a hlawhtlin zel theih nan kawng zawn chhoh ni zel thei se a duhawm hle bawk.
Sorkar hian a duh chuan ruahmanna a siam thei hle a, a hlawhtlinna kawngah pawh hma a la chak thei hle bawk. Tin, a changtute phurna leh inpekna hi a pawimawh ber zel bawk a ni.