Russian Foreign Minister Sergey Lavrov chuan India tlawhin New Delhi-ah hruaitute a kawm kual \an a. Kar tir lamah khan Chinese foreign minister pawh hmu tawhin Moscow hian khawthlang ramten an hrek mek karah Asia khawmualpuia ram lian pahnihte hi a lama \antir tumin a bei mek.
Asian power pahnihte hian February thla tawp a\anga Russia-in Ukraine a rûn demna thu an la sawi lo ve ve a. Lavrov-a’n kar tira China a tlawh hnuah Beijing chuan Russia nena an inkungkaihna tih\hat zel a duh tih a sawi.
Indian Foreign Minister Subrahmanyam Jaishankar nena Zirtawpnia an inkawmnaah pawh Lavrov chuan, “India-in lehlam a\ang chauhva thlir lova lai taka thil a thil hi a lawmawm hle a ni,” tiin Ukraine nena an indo meknaa India thlir dan a sawi.
“Energy, science & technology, van thengreng leh damdawi siam lamah he ramah hian hna kan thawk zel ang,” a ti bawk.
Jaishankar chuan ram pahnih inkungkaihna chu a huang zauh zel a nih thu a sawi a, hetih rual hian tun laia khawvela thil inmungte pawh zau takin an sawi dawn tih a sawi.
“India chuan a lo sawi tawh angin buaina leh inhriat thiam lohna awmte hi palai intira sawihova chin fel hi a duh ber a ni,” a ti.
India hi Asia khawmualpuia economy lian ber pathumna a ni a, tun thlengin United Nations Security Council-ah member nghet a la ni thei lo thung.
Russian leh Indian thuneitute chuan Lavrov-a zinna a hun hman dan tur kimchang leh a tih turte an puang lo ve ve a. Prime Minister Narendra Modi erawh a haw leh hmain a kawm dawn.
Indian leh Russian thuneitute hian khawthlang ramten Moscow a hrek avanga dollar a hman theih loh avangin indawr nana rupee-rouble hman dan tur chungchang te pawh an sawi dun tura ngaih a nih thu Reuters chuan a tar lang.
India tlawn rawn
Lavrov-a’n India a tlawha a tih tum a chian hle lai hian United States leh British thuneitute pawhin New Delhi-ah hian tun hnai lawk khan Indian sorkar hotute kawmin khawthlangin Moscow a hrekna chungchang an sawipui.
US Deputy National Security Adviser for International Economics, Daleep Singh chuan US hian India-in Russia atanga tuialhthei a lak luh chungchangah ‘tih tur chin’ engmah a tuksak loh rualin leisak tam thar thut ang chi erawh ti lo se a duh niin a sawi.
British Foreign Secretary Liz Truss chuan Britain hian India-in Russia atanga man tlawma tuialhthei lei tura thutlukna a siam chu a zah thu a sawi a, hetih rual hian Russia laka lawngchawlhna, rangkachak leh energy sector hrekna na tak a kalpui chu hre reng turin a chah tih a sawi.
Tar lan fo tawh angin India hian tun hnaiah Russia atang hian man tlawm zawkin tuialhthei thlitfim loh barrel maktaduai eng emaw zat a lei a, hei hi khawthlang ramten an hrek avanga an leisak thin an tihtawp hnu niin Russia-in hrekna avanga an harsatna chhawk nan a hmang.
India hian Ukraine atanga nihawi tel (sunflower oil) a lak luh thin pawh indona avanga a theih tak loh avangin Russia atanga la lut turin inremna an ziak tawh.
Ram venhimna lama mi thiamte chuan New Delhi hian Russia hi kum tam tak kal tawh atanga ralthuam a leina ber ram a nih miau avangin a kawmserh ve ngawt thei lo niin an ngai.