Tripura-a pitar kum 90 zeta upa ni tawh chu mipa pahnihin a chenna inah an pawngsual rawn niin police-te chuan Inrinni khan an sawi.
He pawikhawihna hi October 24 daih tawha North Tripura district, Kanchanpur Subdivision huam chhunga Barhaldi khuaa thleng niin an sawi a. Inrinni khan pitar chhungte hian police hnenah an hriattir chauh avangin hriat tlai a nih thu police officer pakhat chuan a sawi.
Pawngsualtua puh mipa pahnih hi an tlan bo va, zawn mek an nih thu Superintendent of Police Bhanupada Chakraborty chuan a sawi.
“Pawngsualtua puh pakhat zawk hian amah chauhva cheng pitar hi a kawm nel hmasa a. Pawi an khawih zan hian a \hianpa nen a in inkalhna chu tihchhiatsakin an pawngsual rawn nia hriat a ni,” tiin officer hian a sawi.
Pawngsual a tawh hnuah hian pitar hi a damlo va, police a hrilh mai lo va. A chhungten a chunga thil thleng an hriat chuan police hnenah an thlen ta a, ni nga zet a liam hman tawh a ni.
Police hian damdawi inah an hruai nghal a, a chunga thil thlengte pawh an zawt tawh a, an chhui zui mek zel tih officer chuan a sawi bawk.
Police hnena thubuai an thehluhah chuan pawngsualtu pakhat zawk hi an khuaa mi tho, Anjan Nama a ni a, kum 35 a ni.
Pitar chuan, “Anjan leh mi pakhatin zanlaiah min luhchilh a. Min pawngsual a, engmah hre lovin min kalsan a. A tuk zinga ka harh leh chuan ka thenawmte ka hrilh a; mahse, Anjan-a hi thil tithei tak a ni a, ka lama \ang tumah an awm lo,” tiin a thil tawn hi a sawi.