Kum 2013-18 chhunga sorkar sum dik lo taka hmanga puh, Kolasib DIET principal hlui, C Vanlalmawia chhui chiang turin Mizoram Lok Ayukta-in Anti Corruption Bureau a hriattir a, thla ruk chhunga chhui zo fel turin a hriattir bawk.
Kolasib MZP Hqrs president hlui, Zosangliana Rokhum chuan RTI hmanga an zawhna, Kolasib DIET-in an chhanaah thil dik lo a awm nia an hriat avangin MZP chuan Lok Ayukta-ah complaint an thehlut tih a sawi a. RTI hmanga an zawhnaah Kolasib DIET-in training an buatsaihah mitthi tawh te, pension tawh te leh training-a kal lo hrim hrimte pawh kal anga tar lan a nih thu leh heng mite hminga pawisa pek chhuah chu tam tham tak a nih thu tar lan a ni tih a sawi.
Hemi chungchangah hian ACB chuan preliminary enquiry an zo tawh nia thudawn niin, mi 257-te thu zawtfiahin, Kolasib DIET principal hlui hian CSS sum leh state matching share sum Rs. nuai 164 a hmannate chu a dik tawk lo ngei nia hriat a ni a. Training-a mitthi tawhte ko anga tar lan chu phain C Vanlalmawia chuan SDEO leh SSA office lamin training tura hming an submit-te an nih thu sawi mah se, a chhuitu officer chuan heng sumte hi training-naa telte hminga lak chhuah a nih loh thu a sawi thung a. Sum khawih chetna atan dan kalhin C Vanlalmawia chuan a mi mal account a hmang nia tar lan a ni tiin, chhui chiannah chuan ‘extra voucher’ Rs. nuai 42 a awm nia tar lan a ni bawk.
Preliminary enquiry report-ah chuan Kolasib DIET principal hluiin Rs. 63,98,575 chu hotu sang zawkte phalna lovin ‘Other charges’ head atangin ‘Office expenses’-ah a divert nia tar lan a ni a. Sum hmanna zingah motor hire leh alloy wheel full set, Rs. 89,800 a lei chu Mizoram sorkar thuchhuak kalh a nih thu tar lan a nih bakah kum 2013-2018 chhungin hotu lian zawkte phalna la hmasa lovin lunch leh dinner atan Rs. 7,86,218 hman a ni a, hei pawh hi dan kalh a nih thu tar lan a ni.
Kolasib DIET chuan 2013-2018 chhung khan SCERT Aizawl atangin fund Rs. nuai 186.35 dawngin Rs. nuai 164.05 chu ‘Other charges’ head-ah leh Rs. nuai 22.3 chu ‘Office expenses’ head-ah an dawng a, hengte hi Kolasib district treasury atanga lak chhuah niin, report-ah chuan tarlan a ni a. Kolasib DIET principal hlui hian refrigerator, television set, stabilizer te lei angin ‘fake voucher’ a siam a, ‘fake canteen bill’ hmang bawkin office ei/in manah sum thahnem tak hman niin heng atana sum hman zawng zawng belhkhawm hi Rs. 5,22,205 a ni tih report-ah chuan tar lan a ni bawk.