Arunachal Pradesh police-te chuan Sino-India inrina, Upper Subansiri district-a mi panga, ram vakte chu Chinese sipaiten an ru bo nia sawi a awm avangin an chhui mek tih Inrinni khan an sawi.
Ruk bo nia sawi chhungte chuan he thil hi Zirtawpnia Nacho-a thil thleng niin an sawi.
Ram vak zinga mi pahnih chu an tlan chhuak thei a, an thil tawn hi police an hriattir.
Superintendent of Police Taru Gussar chuan, “Nacho police station-a office in-charge chu a hmuna kala thil thlengte hre chiang turin ka tir a, rang taka min hriattir leh turin ka ti bawk a; mahse, report hi kan dawn thuai a rinawm,” tiin a sawi a. He chanchin ziah lai thleng hian thu thar an la nei lo.
Ruk bo nia sawite hi Toch Singkam, Prasat Ringling, Dongtu Ebiya, Tanu Baker leh Ngaru Diri te an ni a. An vai hian Tagin hnam an ni.
An chhungte chu district khawpui, Daporijo-a cheng an ni a. An zinga \henkhat chuan Inrinni tuk khan Indian Army nen thil thleng chungchang sawiho turin Nacho an pan.
Nacho hi district khawpui atanga km 120 vela hla a ni.
Ruk bo nia sawi chhungte hian thuneitute hnenah him taka la let turin an nawr a. Sipaite erawh chuan engmah an la sawi ve lo.
Pasighat West MLA Ninong Ering chuan Chinese People’s Liberation Army (PLA) chetna chu a na thei anga chhan let ve a tul tih a sawi nghal.
“Arunachal Pradesh-a Upper Subansiri district-ah PLA-in kan mite panga an ru bo tih sawi a awm a. Thla tam la liam lovah khan hetiang hi a thleng tawh bawk. PLA leh China chet dan hi chhan let ngei a ngai,” tiin Twitter-ah a tar lang.