India ramah darkar 24 liam ta chhung khan coronavirus kai mi 1,033 hmuh chhuah leh hman niin a hma ni aiin an tam hret a, mi 4,30,31,958-in an kai tawh.
Union health ministry-in a chhinchhiah dan chuan hri kai enkawl lai hi mi 11,000 chuang hret chauh an awm tawh.
India-ah hian darkar 24 liam ta chhungin mi 43-in Covid-19 hi an thihpui leh hman a, mi 5,21,530-in an thihpui tawh.
Ministry chuan hri kai enkawl lai hi a kai hmuh tawh zawng zawng a\anga chhutin 0.03% chauh an ni tawh tih a tar lang a, enkawl dam hi 98.76% an ni tawh thung.
Darkar 24 liam ta chhunga sample endik zinga 0.23% chauhvin hri hi an kai tih hmuh a ni a, chawlhkar khat liam ta chhunga endik zinga 0.22%-in an kai bawk tih ministry chuan a sawi.
Hri kai hmuh chhuah tawh zinga enkawl dam tawh zawng zawng hi mi 4,24,97,567 an ni tawh.
Invenna pek beihpui thlak kal zelah vaccine hi dose vaibelchhe 185.18 chuang pek a ni tawh.
Ministry chuan hri leng thihpui zinga 70% chuang zet chu natna benvawn nei lai an nih thu a sawi.
1Tun hnaia zir chianna thar neihah SARS-CoV-2 kai tawhte chuan thla ruk chhungin thisen khal an nei thei tih hmuh chhuah a ni a, hei hi la na vak lote zingah pawh a awm niin The BMJ chanchinbu chuan a tar lang.
2Puducherry union territory-ah chuan darkar 24 liam ta chhungin coronavirus kai hmuh chhuah an awm lo va, ni riat a zawnin kai hmuh an awm lo tawh tih an sawi a, thihpui thar pawh an awm lo.
3India-a hripui tuar na ber, Maharashtra-a Thane district bikah chuan darkar 24 liam ta chhungin coronavirus kai mi paruk hmuh chhuah niin he district bikah ringawt hian mi 7,08,822-in an kai tawh a, thihpui thar erawh an awm lo.
4Maharashtra khawpui, Mumbai-ah chuan genome sequencing tih sample 230 zinga pakhat chuan variat thar, XE a kai tih hmuh chhuah a ni.