Colombia ram Supreme Court an rama mi sual pawl (gang) lian bera an hotupa chu United States-ah thawn chhuak turin a ti.
Dairo Antonio Úsuga, Otoniel nia hriat lar hian Gulf Clan cartel kaihruaiin US-in ruihhlo tawlhruk chungchanga a mi man duh ber pakhat a ni.
Kum sarih zet man tuma zawn a nih hnuah October khan an man a, President Iván Duque-a chuan hlawhtlingna changa Otoniel-a an man thei chu Pablo Escobar-a hun tawp lam, a tlukchhiat tur nen a khaikhin hial.
Court thutlukna hi Twitter-ah puan niin Otoniel-a aiawha dan hre mi dingte chuan thawn chhuak lo turin theihtawp chhuah mah se an hneh zo ta lo.
Colombia-a Justice Minister Wilson Ruiz-a chuan nikuma an man hnu lawkah khan US-a a chungthu ngaihtuah tura thawn ngei a lo tiam tawh a. November thla khan Washington-a Justice Department thuneitute pawhin an rama thawn turin ngenna an lo thlen tawh bawk.
“Khawvel huap sualna titu thawn chhuah hi a nghahhlelhawm hle a ni,” tiin Defence Minister Diego Molano chuan hetih lai hian a sawi.
A dan hre mite erawh chuan Otoniel-a hi Colombia-a kum 60 zet sorkar leh Revolutionary Armed Forces of Colombia (Farc) hel pawl buainaah a inhnamhnawih thuk avangin an ram chhungah, a bika a chungthu rel tur ruatten a chungchang ngaihtuah turin an \ang ve thung.
A dan hre mite hian kum 50 mi, Otoniel-a hian thawn chhuah a nih loh nan sorkar leh hel pawlte indawr ruk dan tam tak sawi tur a nei niin an sawi.
Man a nih lai khan Otoniel-a hi Colombia-a luman to ber niin sorkarin $8,00,000 a chhiar a. US phei chuan $ maktaduai nga zet a chhiar.
Otoniel-a kaihhruai gulf clan cartel
Gulf Clan an tihte hi Colombia-a province hrang hranga an chettlat bakah ram pawn lamah pawh thawhpui an nei tam hle a. Ruihhlo an tawlh bakah hian mihring hralha sumdawn te, dan lova rangkachak khur neih leh mi pawisa chhuh te pawh an ching.
Ralthuam nena inthuam member 1,800 chuang an ni a, a tam ber hi far-right paramilitary-a lo tang tawh an ni a. An member tam tak hi Argentina, Brazil, Honduras, Peru leh Spain-ah te pawh man an ni thin.
Otoniel-a hi kum sarih zet zawn a nih hnuah Columbia hmarthlang, Antioquia province-a thingtlang kilkhawr takah October thla khan man an ni a. An manna hi Panama nena an inrina bul lawk niin man tur hian sipai 500 leh helicopter 22 zet a thawk chhuak.