Academy of Motion Picture Arts & Sciences chuan vawiin hian best actor dawng hlim hlawl Will Smith chu presenter Chris Rock a ben chungchanga ngaihtuahin, hremna lekkawh chungchangah an sawiho ang.
Ruahmanna hmasa ah chuan he thil hi April 18-a ngaihtuah tur tih a nih laiin, zirtawpni kaltaa Smith-a’n Academy atanga banna a thehluh tawh tho vang leh a chunga hremana puan reng reng chu lungsi taka a pawm tur thu a sawi tawh tho vangin nghak khawtlai lova chinfel nghal mai chu tha an ti tlang a ni.
Smith lakah hremna lekkawh a nih chuan award an sem lehzel turah Smith a lang thei tawh dawn lova, Oscar semna hmuna tel phalsak a ni lo bawk ang.
Tarlan tawh angin, Los Angeles, California-a 94th Academy Awards , ‘22 (Oscar) sem zawh takah khan Will Smith-a’n Host Chris Rock na taka a beng chuan sawizui a hlawh a, award dawng te aiin mite’n an ngaihven zawk.
Dawhsan atanga a nupui lu kawlh chu fiamthu ti tak deuha a kah vanga lungawi lo chuan a thutna atanga tho chhuakin a han beng ta a ni. Will Smith-a nupui Jada Parinketh Smith hian sam lama harsatna lian tak, Alopecia an tih mai vangin a sam a tla fai vek. A nupui thlavang hauhin tharum a thawh ta mai a ni.