Bollywood star John Abraham film thar, ‘Attack’ chu box office-ah flop mah se, a film siam leh thawhpuite a chhuang hle, a ti.
Instagaram-ah hemi chungchang hi tarlangin, film buaipuina leh tlangzarh hnu lam thlenga amah thlawptu leh duhsaktu fan te chungah a lawm. “He film kaltlanga feedback kan dawn te chu engpawh nise, thil thar leh danglam tak lo dawngsawng a, pawmtute chungah kan lawm lehzual. Attack film hi keimahni lam atang chuan kan theihtawpa tha leh dik tak ni tura buatsaih a ni a, film industry-ah thil thar leh fresh tak mai hlui kan tumna a ni.
“Covid-19 hripui thawh thum meuhin min nuaina karah siam a nih angin a hautakin, chona namen lo kan hmachhawn. Kan duh erawh hmu tho chuan kan inhria. He film hi ka chhung em em a ni,” a ti.
‘Attack’ film hi a tir lamah chuan Box Office-ah beiseiawm takin a rawn chetha viau na a, kartawp a thlen meuh chuan sum lakluh a hniam nghal tual tual. Tlangzarh atanga ni thumnaah trade analysit Taran Adarsh chuan he film hian beisei a pha lo hle a ni, tiin a ziak.
‘Attack’ film ah hian John Abraham hi super soldier lemah a chang a; Rahuil Preet Sing leh Jackqueline Fernandez te an lang ve bawk. April 1 khan tlangzarh a ni.