Calcutta High Court chuan Zirtawpni khan West Bengal-a Trinamool Congress leader Bhadu Sheikh-a thahna chu Central Bureau of Investigation (CBI) chhui turin a ti tih news agency PTI chuan a tar lang.
Sheikh-a thihna avang buaina lian tak chhuakin ama phuba laksakna ni ngeia sawiah mi pakua lai an inah hal khunga tihhlum zui an ni.
High court hian inhal hlumna nia sawi thleng pawh hi CBI chhui turin a lo ti tawh a, an chhui mek a, mi man pawh an nei tawh bawk.
Chief Justice Prakash Shrivastava-a kaihhruai division bench chuan Sheikh-a thihna chhui hna hi CBI thawh turin a titlu a. Sheikh-a thihna leh a hnua Bogtui khuaa in hala mi pakua thihna chu inzawmna nei niin a sawi.
Bengal DGP chuan Bogtui-a tharum thawhna kha an khuaa panchayat deputy chief Sheikh-a thih hnu lawka thleng niin a sawi.
Bogtui khuaa thil thleng hi a thlen a\anga ni li, March 25 khan Bengal sorkarin a chhui tur team a dinte chuan CBI kuta hlan turin an ti.
Ningani khan CBI team hian Bogtui inthahnaa inhnamhnawih nia an puh mi pali chu Mumbai-ah an man a, man hmasak ber an ni.
An vai hian Bengal-a cheng niin Mumbai-a CBI unit hnena man tura thu thlen angin an lo man niin Kolkata-a office chuan a sawi.
An mobile phone chu Bogtui-a in hal a nih lai vel khan he khaw bulah hian chhui thlen a ni tih a sawi.
Mante hi Bappa Sheikh, Sabu Sheikh, Taj Mohammad leh Serajul Sheikh te niin Bogtui khaw mi vek an ni.