Khan-a hian paih thlak a nih hma tawhah khan a finfiahna engmah sawi si lovin United States atanga nawrna avanga amah paih thlak tumna a awm thu a sawi tawh a. Hei hi Russia leh China nena US an innghirnghona chungchangah Washington lama a tan duh loh vang niin a sawi.
Pakistan-a eptute hi ram danga thiltithei takte nen an thawkho niin a sawi a. A kaihhruai PTI atanga rorel member-te pawh buk a nih hma lawka chhuakin ram dang atanga phiarna tuartu niin a insawi.
US erawh chuan puh an nihnaah ‘thu dik a awm lo’ niin an sawi a, Khan-a hian a thil sawi finfiahna a sawi miah lo bawk.
Eptuten Khan-a rintawk lohna an put luh hi Pathianni hmasaa buk tawh tur kha a ni a; mahse, Khan-a kaihhruai party-a tel, Deputy Speaker Qasim Suri chuan dansakin eptute chet danah ‘ram dang an inrawlh’ niin a sawi a. Suri-a hian eptute chet dan chu danpui kalh nia sawiin ram tana rinawm turin a ti bawk.
Khan-a sorkar hian president hnenah parliament thiat tur leh a hma thei anga inthlan buatsaih a nih tur thu an thlen a. An chet dan hian eptute thin a tirim hle a, prime minister chuan amah buk a nih lohna turin thil a phiar kual vel niin an sawi.
Eptute tangrual chuan Supreme Court-ah petition thehlutin ngaihtuahsak turin an thlen.
Ningani khan Pakistan-a court sang ber hian Khan-a’n amah an bukna tur vote thlak a dang chu dan lo a tihsak ta a. Eptuten amah rintawk lohna an put luh chu kaltlangpui turin a ti bawk.
Inrinni khan rorel inkhawm neih zui niin prime minister pawh buk mai tura ngah a nih laiin an ram rorelna in hniam zawka speaker ni lai, Khan-a thawhpui, Asad Qaiser chu a bâng leh a, hei hian thil a tikhawtlai zual leh bawk a ni.
Eptu hruaitu, kum 70 mi, Sharif-a chu prime minister turin eptute chuan an vawrh chhuak nghal a, Thawhtanni hian thlan a ni dawn a. An vawrh chhuah hnuah eptu hruaitute chu an ram danpui tana an din tlat avangin Sharif-a hian lawm thu a hrilh.
Khan-a kaihhruai PTI pawhin Shah Mahmood Qureshi chu prime minister atan hian an vawrh chhuak ve nghal bawk.