Indian Prime Minister Narendra Modi leh United States President Joe Biden te chuan Washington-a an foreign leh defence minister ve ve an inbiak hma lawk, Thawhtanni zan (India-a Thawhlehni zing lam) khan ral atangin an inkawm a, an inbiakna kimchang erawh hriat hman a ni lo thung.
Ram pahnih minister-te kum tina an inbiakna, 2+2 Dialogue an tih hi kum 2018-a an inkungkaihna a that zawk theihna tura bul an tan a ni.
Inbiakna hi an inkar tihngheh piah lamah Asia khawmualpuia inkungkaihna tha a awmtir tumna a ni a. Washington-in India chu Asia rama China a lian bik lutuk tur dang tura puih a tumna a ni bawk.
Ram pahnihte hi kawng tam takah an inthurual tawh thin a, khawvel buaipui thilah an ngaihdan a inang deuh zel.
Hetih lai hian tun hnaiah erawh Russia-in Ukraine a rûn chungchangah ngaihdan inang an nei lo.
Delhi-in thuchhuah a siamah chuan tih dan pangngaia ram pahnih inkungkaihna tihngheh lehzualna tur sawiho a ni dawn tih a tar lang.
Washington atanga thuchhuah ve thung chuan Russia-in Ukraine-a indona a thlen mek chungchang chu an sawiho tur lian a nih thu a tar lang a, US hian India hi Moscow a tan nia a lannaah nawr a tum a ni.
India leh US hi February thlaa Ukraine-a indona a awm atang tawhin an ngaihdan a inang lo.
Delhi hian inrûn chungchangah na tak takin thuchhuah siam mah se Moscow sawiselna tak erawh a la chhak chhuak lo va. UN-in Russia demna tur thu tihtlukna tur vote lakah a hai bawk.
India hian khawthlang ramten an hrek nasat lutuk avanga Moscow talbuai tur puihna atan a tuialhthei chu Russian firm-ten man tlawm zawka an zawrh a leisak bawk.
Moscow hi Delhi thian tha niin a ralthuam leina ber a ni a, ram dang atanga ralthuam a chawk luh zahve aia tam mah hi Russia siam a lei a ni.
US-INdia inkar
1Biden-a leh Modi-a hian an ram inkar thil an sawi rin a ni a, Ukraine chungchang pawh sawi tur awm tak zingah a tel.
2Indian Foreign Minister S Jaishankar leh Defence Minister Rajnath Singh te pawhin US Foreign Secretary Antony Blinken leh Defence Secretary Lloyd Austin te chu Thawhtanni zan vek khan an be dawn a. Ukraine nena an ngaihdan inan lohnate pawh an sawi rin a ni a; mahse, ram pahnih inkar thil an khel lian ber dawn.
3Washington hian China-in Asia-Pacific vel a thunun tur dang thei ber turah India hi a ngai a. Tun aia lian zawka insumdawn tawn pawh a theih ve ve tih an hre bawk a. Kum 2021-a $ tluklehdingawn 113 vela insumdawn tawh chu nakin zelah $ tluklehdingawn 500 vela tihpun an tum.
4India hian ram venhimna hmanraw lak luhna atan US hi a duh ve bawk a, Russia-a an innghat lutuk chu tihnep nen a duh a. Moscow hi India hnena ralthuam leitirtu tam ber a ni a; mahse, a hmaa India-in ram dang atanga a chawk luh zinga 70% vel tum thin kha 49%-ah a tla tawh a. US chu kum 2011 leh 2015 chhung khan Russia dawta a leisak tam ber a ni a; mahse, kum 2016 leh 2021 inkar khan France leh Israel a phak lo thung.