Bihar-a police-te chuan thira sak lei hlui rua puh an nih avangin mi pariat an man a. Heng mite chet dan hi pui leh danglam tak a ni a, an ru hrawl hle.
Rukrute chet dan
Kar hmasa khan mipa pali panga vel, thenkhat chu state sorkara Irrigation Department-a thawkte chu Amiyavar khua, Sasaram khawpui bul lawkah earth excavator leh gas cutting torch nen thawk chhuakin a bul hnaia chengte pawh sorkarin an lei hlui, hnawksak tak chu thiatin an senghawi tawh dawn emaw tiin an lawm hle.
Ni thum chhung chu heng mite hi zing dar 7:00 atanga ni tlak thleng thawkin lei chu an thiat a, gas torch hmangin a thirte an tan a, a hnuai lei inhnawhte pawh excavator hmangin an hai bawk.
Thite hi van an hawh hmangin an thiar zel a, thir hlui sawngbawlna (scrap dealer) hnenah an dah zel.
Lei atanga metre 200 vel chauhva hlaa cheng, chanchinbumi, Jitendra Singh chuan, “Tumahin inbumna a ni ang tih kan ring pha lo,” a ti.
“Tuk tin a bul hnaiah ka kal ziah a, hna an thawk ka hmu ziah a, kan in bula mite pawhin an hmu,” a ti.
Lei thiah hna hi Irrigation Department-a part time-a thawk, Arvind Kumar-a chuan a vil nia hriat a ni a, tun hnenah mah ‘sorkar thu anga thiah’ a nih thu a sawi ri lo.
Ani hi man pariat zingah a tel tih police hotu lian, he thil chhuinaa hotu, Ashish Bharti chuan a sawi.
“Irrigation Department-a thawk dang, Radhe Shyam Singh, van neitu leh scrapyard neitu pawh man tel an ni,” a ti.
Chhun ênga inrawkna
Feet 60 (18m) vela sei, feet 12-a sang, thir lei hi Ara tuikawng chungah kum 1976 khan dawh niin kum 2000 vel atang khan a bulah concrete bridge siam a nih tak avangin hman a ni ta lo.
Khaw mi pakhat, Shailendra Singh-a chuan ngaihsak a hlawh lo hle tih a sawi.
“A thingte a mawih zo tawh a, a thirte a tuiek a. Rukruten a kilhna leh a thir tenau ruin an hralh a. Kar hmasaa thil thleng erawh chhun ênga inrawkna dik tak a ni,” a ti.
Jitendra Singh chuan rukruten an thiah hma lawk hian khaw hotupain thuneitute hnenah lei hlui chu hriselna atan a that loh avanga thiat tura ngenna a thlen tih a sawi.
Vawi tam tak ran vulh bakah mihring ruang thlengin luiin a len a, lei hnuaiah hian a tang thin niin a sawi.
Hriat chhuah a nih dan
April 5-a lei rututen an thiah ni thumnaah chiah a bul hnaia cheng, Pawan Kumar-a chuan lei hlui chu thiah a ni tih a lo hre ve a.
“Irrigation Department-a hotu, Radhe Shyam Singh-a biak ka tum a; mahse, min chhang lo va. Hotu dang be lehin lei thiahnaah engvangin nge tih dan pangngai zawma a thiat tur kohna, tender chhuah lo leh a chhang hniam ber hnenah engvangin nge an pek loh tih ka zawt a ni,” a ti.
Hetah hian hotu lian hian engmah thupek an chhuah loh thu leh lei chu thiah a nih si thu an hre ta a ni.
Police-ah complaint thehlutin an chhui zui ta a. “JCB machine [earth excavator], gas cutting torch leh cylinder, pick-up van leh thir kg 247 kan hmu chhuak zui a ni,” tiin Bharti chuan a sawi.
Thir an ruk chhan
India ramah hian hmun hrangah tui pipe ruka dan lova din factory tenauva hralha silai chher nante hman an ching hle.
Kawnga khuar khuhna thir te, rela inthiarnaa ni thlengin ru duh an tam hle.
Kum rei vak lo kal taah khan Indian Railways chuan rela inthiarnate tichangtlungin thir no dahin thlun a ni bawk.
Thir ruk hi India chauh ni lo, United States, UK leh Europe ram tam takah pawh an ching ve hle tho.
Lei ruk a thleng fo
US-ah October, 2011 khan Pennsylvania khawthlang lam khaw tereuh te-ah thir lei feet 50-a sei chu ruk a ni tawh.
Kum hnih kal ta khan thir ru thinten Russia ram, Arctic huam chhunga Murmansk-ah relkawng lei hlui, feet 75-a sei, tonne 56 zeta rit chu an lo ru tawh.
Kum 2012 pawh khan thir ru thinten Czech Republic-a kea kalna thir lei chu lehkha lem siama cycle kalna kawng siam belh tur anga insawiin an ru daih bawk.