- LIANHLEIA
Ka beisei a ang lo, ka lo beisei dan chuan Political Party hming lam ri chunga pawl dangte sawichhiatna leh mahni awmna party fakna bu a nih ka ring a. Chu lam a ni lo, kan ramin hmasawnna tur kan la ngah zia leh mipuite beidawng lova ram tha leh zual pan tura a fuihna thu a ni ber mai. He lehkhabu hi a chhah lova, phek 56 chauh a ni. A ziak a hraw in a fiah a, thupui 7 ah a then bawk.
He lehkhabua a thu hrilhfiahna atana entirna tha tak tak a sawite hi angaihnawm piah lamah a ziaktu Pu Lalsawta hian lehkhabu a chhiar hnem hle a ni, tih hi phat rual a ni lo. James Hadley Chase-a thawnthu bu, The Paw in the Bottle tih te, US President inthlana Democratic Candidate John Kerry chungchangte, Eskimo/Enuit Etah ram sik leh sa te, Colombia, Cambodia leh Mexico a an ruihhlo hralh dan chungchang te, Colombia ramhnuai sorkar FARC chungchang te, kum 1800 vela Argentina leh America ram dinhmun te, John F. Kennedy thu leh hla te, Haryana CM hlui Chautala, Bihar CM Lalu, Union Minister Sukh Ram-a te chanchin te, kum 1991 a Economic Reform te, William Wilberforce in sal neih a duh loh dan leh sal neih duh loh a sual hlawhtlin dan te, Hopewell Holdings Company in hotel an sak dante, Wie Wiesel thu leh hla te hian he lehkhabu hi a ti ngaihnawmin a ziaktu hriatna zau hi a pho lang chiang hle a ni.
Mizorama Political Party pakhat chuan, kan ramin hma a sawn a, hmasawnna hna pawh kan thawk mek zel a. Hri leng karah pawh theihtawp kan chhuah a ni, an tih laiin Political Party pakhat ve thung chuan, State kan nih atanga kum 36 chhung eng hmasawnna mah Mizoramin kan nei lo hi a beidawn thlak, tiin mipuite hi beidawng ngawih ngawih turin min zirtir a ni ber. He lehkhabu ah erawh hi chuan kan hmasawn dan hi ala fuh tawk lo hle a. Mizo mipui, thuawih thei em em mai kan nei a. Ram tha kan nei a, System tha tak leh Political Will kan neih phawt chuan ram dangte aia sangah kan ram hi tundinin a awm thei a ni tiin beiseina nei tawh lo te a rawn fuih thar ve leh thung a ni. Sorkar sum hi kan thawhkhawm a nih ang ngeia kan ta a nih thu leh sorkar sum eiruk a zahthlak thu a rawn sawi bawk.
He lehkhabu ziaktu rilru zau zia han tarlan hi ka chak tlat. Mizo thalaite zinga mahni line a chhuanawm tak tak a rawn tar chhuah te zingah David Zohmangaiha, MNF ticket a AMC Councillor hming a rawn ziak lang tlat mai hian a ziaktu rilru zau zia a tarlan bakah Political Party ngaihtuah lova kan ram leh hnam siam that a tum zia a pho lang chiang hle a. Tin, party induhsakna tur emawa mipui sum lo hman hi a zahthlak zawng pawhin a zahthlak hle a ni, an rawn ti ngam hi chu Political Party President ni ve meuh tawngkam tur a ni em? Hetiang a nih chuan sum leh pai uma an mahni party chhunga rilru dik vak lo, party worker te hi a hnawt tiau zo mai angem aw, ka ti. Tute Party President emaw kha chuan kan sorkar hunah a hnathawk tuten a ril phiar leh a pumpui tlang chhah an chang hmasa ang, Contract hna kan pe hmasa ang, tiin Chanchinbu ah an ziak lang kulh kulh a ni a. Pu Lalsawta erawh chuan, tih bik neih tha a ti lova, kan ramin hma a sawn a, sum leh pai kan hniang hnar a nih chuan chu malsawmna chu Zoram mipuite, kan zavaia kan chan ho tur a nih thu a sawi daih thung.
Sibuta khan Darlalpuii chu a naupan laia amah tiduhdahtu a nih avangin sial angin a chhun hlum tih rawn ziakin, diklo ti mahse a ram rorelnaah a thu hnialtu an awm lo. Democracy kan nih avangin chutiang chu a theih tawh loh. Mahse, vawiin khawvelah pawh hian ram tam takah rorelna hi a tla hniam nasa tawh. Ram tlu chhe mai tur an hriat lawk theihna pakhat pawh chutiang ramah chuan dan zahna leh dan leh thupek kenkawhna a tlabal thin a ni, tia an sawite hian ram a vei zia leh hmasawn tura ke kan pen a hun tawh zia a tarlang chiang hle a ni.
He lehkhabu hian Mizote kan rinawm thin zia tarlangin Pu Lalnuntluanga, Ex-MLA thusawi rawn sawi chhawngin Vai sipaiten an thil ru tua Mizo Sipai an puh changa, Mizote hre chiangtu Sap sipaite khan an puh dik lohzia sawi nan ‘Mizo a ni a sin’, tih tawngkam an hman dan a rawn ziak a. Mizo mipui hruai harsaa sawi thinte hian hruai kan nawmzia hi hre reng se, kawng dik leh tha zawh tur chuan kan rin zawngte thu hi zawm kan harsat lo, tiin Mizo ten nun mawi tak kan neih thu a rawn sawi a. Sorkar tha kan neih loh avang chauha rinawm thei lo, tha thei rih lo, kan nih rih thu a rawn tarlang bawk. Thil tha tih duhna lama huaisen a tul thu sawiin entirna atan Pu C. Pahlira a rawn hmang leh tlat bawk. A hunah chuan thawhpuite ngei pawhin an phurpui loh, mi hmai sa a tawng nasa dawn tih hriat ngawih ngawih, mahse, ram tana hmathlir thui tak nei a nih avanga chutiang hun harsa alo pal tlang dante ngaihnawm takin a ziak bawk.
Sorkar thaah chuan thil tha tih a awlsam a, thil sual tih erawh a harsa thin; sorkar thaah chuan retheih a zahthlak a, sorkar tha loah chuan hausak hmasak a zahthlak thung tiin thu tawite, fiah tak siin a ziak a. Hemi entir nana Cowboy pakhat an hmang tlat mai te hi angaihnawmin a dik a sin. A ziaktu Pu Lalsawta hi Politician a ni a. Congress President nilai a ni bawk. Heti chung hian mi corrupt te hian engkim hi suma lei theih vekin an hmu tawh thin a. Voter leh an party hotute thlengin lei theihah an ngai vek thin, tiin a rawn ziak ngam!
Unau pahnih a pain remhre taka cake a inphel tir dan a rawn tarlan hian he lehkhabu hi a khaikhawm viau niin ka hria a. Ram hruaitu ni tura qualification a rawn dah pathum te hi kan ram leh hnamin hma a sawn theih nan a tawk tiuteu viau a ni. Sualna leh dik lohna hneh tur hian mitha rual ngawi tlat te hi an tangkai lova. Mafia, Gang leh Drug Lord te hian tangrual ve ngam lo mipui an duh duhin an thunun thin. Mipui kha tangrual ngam se, mi tlemte dik lo taka khawsa te hi hmehmih mai theih an ni tiin mipuite chu dikna tana tangrual turin he lehkhabu ziaktu hian min sawm bawk a ni. He lehkhabu a thuziak hi a tam lo, phek 56 chauh nimahse, a zira zir tham tak tak a ni a, kan ram leh hnamin hma a sawn theihna turin roreltu chu tupawh lo nise, he lehkhabu hi ram hruaitu ni mek leh ram hruaitu la ni turte tan zir tlak a ni a. Ram leh hnam vei mite tan puar awkna tham a niin ka hmu.