Lirthei tam zel hi ngaihtuah that deuh a ngai
Lirthei nei kan tam zel a, khawpui chhungah lirthei a tawt tawh hle. Nitin traffic jam kan hmachhawn leh ta luih luih mai a, heti tak maia kan kawngpui a chep ta leh lirthei a tam ta mai hi ngaihtuah a ngai khawp mai.
Lirthei nei nazawngin hawlhchhuah kan tum a, a endiktu lam an indaih thei meuh bawk si lo. Lirthei a tam na na na chuan fimkhur tawk lo leh midang ngaichang lek lova khalh fimkhur lo an awm phah a, a bikin hmeichhe lirthei khalh an ni zual! Ke hnih nei khalhtute zingah midang vengthawng lo leh mi intlarna kara tu mitmei mah veng lova lim phei puat puat an tam a, chetsualna a thleng mai ang tihte pawh hi hlauhawm tak a ni.
Traffic police duty te an hahin, an rim em em a, ni sensa hnuaia dawhthei leh zai ngai taka an duty an la hlen theite hi hlu tak, zah tling an ni. Thenkhat phei chu an la nui zawk thei zu nia! Chutih rual erawh chuan lirthei khalhtu, fimkhurna tlachham thenkhatte hi chu man ngam chho se la, hmeichhia an nih avanga chhuah leh ngawt mai an nei thinte pawh hi inenfiah deuh teh se.
Kan inham strick deuh loh chuan kan mutan hi a la ngai reng dawn. Kawng chhawng kan la nei mai dawnin a lang lo a, motor hlui lamah lah tlan phal loh chin bituk kan nei chuang bawk si lo, kan harsatna sukiang tur chuan duty indah thahnem ila, khirh zual ila, en liam ngah lo ila, sorkar pawhin traffic police lam hi ngaihtuahah neiin, a tul a nih chuan dah belh tam zual mai rawh se.