- Mahmuaka Chhakchhuak
Kum 1960 daih tawhah khan Thanpuii Pa chuan ‘Mi dawihzep, awmhmuna inhrosa vak vak mi, min thelhtu tur an awm tih hriat chhung chu pawngpawrh tur tur a, a sa seh meuh erawh ngam hauh lo, mahse huaisen ber anga lan tum mi kan ni. Thenawm khawvengte hmangaih hle anga lang si, a ruka an chhiatna zawng ruai si, ‘Ka mei rap se, chu ila ti thah…….Kristian inti si, Krista mizia reng reng zir duh lo mi, Pathian thuhriltu inti si a, sual lawm mi, rilru taka sakhaw hmangaih lo a, vangtlang ngaiha mawi tur chauha sakhaw ngaihsak mi, a tawi zawngin ‘rilru fai si loa puan chang tivar’ te kan ni’ tia alo sawi tawh hi vawiin thleng hian kan tawng chho dik mawlh mawlh ta reng mai hi a mak ngawt mai. Mizote hian mize thatna lai tak tak kan neih laiin kan mize thatna lai aiin a that lohna lai hi a lansarh zawk thin avangin Thanpuii Pa lo sawite hi thenkhat chauh a ni nain vawiin thlenga kan mize dik tak ala nih bawk avang hian a pawi mange tih bak chu sawi tur a vang rih a nih hi maw.
Hmasawnna tam tak chu kan nei nameuh mai nain kan mizia berin hmasawnna lam a hawi bawk si loh chuan kan hmasawnna tam tak hi a khingbai lo thei lo a, vawiin huna In tha leh ropui tak tak kan neihna te, incheina changkang leh nalh tak tak kan neihnate hian kan mizia hi a thupbo thei tak tak chuang lo a nih hi. Inchhung khur mai bakah pawn lamah thil pawimawh kan ngah a, kalkhawmna tur leh awmkhawmna tur eng eng emaw hi mi pangngai tan chuan kan nei awl lo a, chungahte chuan kan mize mak tak tak hi lantirin a awm fo thin. Tunlaiah phei chuan social media-ah mi tam takte chuan an mize mak tak takte an phochhuak thin a, mi tam tak tana chhiar ngam loh tur zahmawh ngial ngan tak takte thlengin kan sawi bawrh bawrh ngam ta zel mai hi a pawi ngawt mai. Aia upa zahna kan tlachham sawt hle mai bawk a, mipa leh hmeichhia kan mizia a in ang reng ta bawkin sawi hreh leh zep sise neiloa thil sawi bawrh bawrh mai kan ching ta viau mai bawk hian ram ropui tak hi min thlen hmel loh ngawt a sin.
Tumkhat chu tuikhurah hian hmeichhe tleirawlte leh a nu rual tur nu pakhat hi an inhau ka ngaithla reng a, kha tleirawl zahtheihlohzia kha vawiin thlengin ka ngaihtuah chang apiang hian zahpuiawm hi ka ti tawp thei lo a ni. Tawng chaltlai tak takin a ankhum a, a dang a nal bawk si avangin a upa zawk tan pawh tawng ve na hun awm lo khawpin a tawng chak a, a tawngkamte reng reng pawh chu a huatthlalaawm vek a ni mai. Kristian chhungkua tha tak atanga seilian a nih hi a rinhlelhawm rum rum hial a, mak tak hi a ni ringawt. Hetiang hi kan mizia a nih tlat tawh avangin kan Kristianna leh kan mizo mize tha takte hian hmun pawimawh a chang tawk lo tih pawh a chiang reng a, kan nakin hun zel tur hi ngaihtuahawm tak a ni thei ang. Nu leh pate thunun theih tawh loh thalai engemawzat kan awm tawhte leh nu leh pa zahna chang hre lo kan tam tak avangte hian mizote hi tun aiin a hnam ang pawhin mualpho kan hnaih zel mai angem tihte pawh ngaihtuah tham tak a tling ta hial awm e.
CoviD hripuiin nasa takin kum hnih aia rei min chimbuai a, chhungkaw rethei ber atanga sorkar hotu berte thlengin kan buai vek mai. Nitin nunphung leh khawsakna zawng zawngah harsatna kan tawkin eizawnna thlengin kan buai phah a, chung zawng zawng bakah chuan kan mizia dik tak pawh min phawrhsak a nih hi. Mize nghet nei lo leh mize tha lo tak takte tan phei chuan he hripui leng hi ngeiawm tak tur a nih laiin mize thate ngei pawh thup rual lohin min phawrhsak vek tho a ni. He hripui leng hi thenkhatte tan chuan huatthlalaawm tak tur pawh a ni ang a, ngeiawm tak tur hi a ni. Nimahsela hei tunah chuan kiam lam a pan tan deuh ni pawhin a hriat a, khawsak pangngaiin kan khawsa leh thei tan tawh turah ngai ila a tha ang e. Mahni hnathawktute thlabi hlawh pawh pek theih loh laia lehlama a thlawna midang hnena tanpuina lo pek te, social media-a mahni thiltih that tarlang zut zut reng thinte pawh kan la theihnghilh kher awm lo e.
He mize tha lo leh nghet lo tak hian he hnam hi a tihmualpho tawh fo thin avangin a veiawm a, pawl angin emaw a huhoin emaw han vei viau thin mah ila a sawt tak tak thei bawk chuang si loh avangin hian tunah chuan a hnam anga thil veiawm tak alo tling ta hial mai. Sakhaw puithiamte ngei ngei pawhin he ze tha lo tak hi an lo kai zel tawh bawk avang hian fihlim tak tak thei kan awm ta meuh pawhin a rinawm loh a, tlawmna puan sin chunga kan beih a ngai ta hle mai. Jim Nelson Black-a chuan hnam ral tur zia hetiang hian a sawi a – Dan mumal lohna, hna hmuh lohna, induhsak bikna, zirna tlahniam, culture tlachhia, tradition hloh, sum leh paia intlânsiakna, mipat hmeichhiatna hluar, sakhaw ngaihnepna, nunna hlut lohna tiin. Hei hi a dik ngawt a sin.
Hnam dangte chuan an ram leilung an hmangaihna lantirin leh an duat em em thin laiin keini chuan ram neihsa pawh kan humhalh hleithei lo a, Assam nena kan inrina lamah phei chuan sawi tur nei lo khawpin kan tlawm a nih tak ber hi maw. Hei hi a veiawm rualin a chhunga chengte mizia hi ala veiawm zawk mahin a hriat a, kan thalaite nungchang leh mizia phei hi chu ngaihtuahawm tak a ni ta. A taka ram leilung min chuh buai aia nasa zawkin kan hnam hian kan la chhiatpui thei zawk ngei dawn ni pawhin a hriat hial a ni. Incheina lamah hma kan sawn chakin neih bak baka inchei kan uar a, ram changkang zawka chengte mize tha lo lai lai hi kan entawn emaw tih mai turin awmbawra hnute bu langthiang rual thei khawpa kawrnghawng zau hak kan uarin mal tawp thleng thlenga lang thei khawpin kan nula te chuan pawnfen an lo feng chhing ta bawk a nih hi. Heng zawng zawng ngaihtuah hian kan thanharh a hun takzet tawh a, kan mizia tam takte hi siamthat a lo ngai ta.