BJP hruaitu, Karnataka Minister KS Eshwarappa chu contractor pakhatin a intihhlum hmaa message a thawn chhuahah ei ru leh a intihhlum chhana a puh avangin a bâng ta.
Pathiannia bânna a thehlut hmain amah thlawptute hnenah ‘a lo kir leh dawn’ tih a sawi a. Bengaluru-a bânna a thehlut tura a lut pawh car a inzui hnem hle.
A bial, Shivamogga-ah phei chuan amah tantuten ‘tihluihnaa bântir’ a nih duh lohna an lantir.
“Ka senior leh party chhunga min duhsaktute tana harsatna siam ka duh lo va. Zanah chief minister nen kan inhmu ang a, bânna ka thehlut ang. Thiam changin ka lo kir leh dawn ti ka chiang a ni,” tiin thuthar lakhawmtute hmaah a sawi a. Eshwarappa hian chief minister hi Pathianni zan dar 8:00-ah a hmu.
Congress MLA Priyank Kharge-a’n ‘40% cut money scandal’ an tihah mi dang pawh an inrawlh nia a sawi chungchang an zawhnaah Eshwarappa chuan, “Scandal phena hming lang zinga pakhat a nih loh chhan tur eng nge?” a ti.
Thawhlehni khan contractor Santhosh Patil-a chu a ruang chhar niin Karnataka-a Rural Development and Panchayat Raj Minister Eashwarappa hi phone-a messages thawn chhuah hnuhnung berah telin a intihhlum chhana mawhphurtu ber angin a sawi. WhatsApp-a a thiante leh politics hruaitute a thawnah Prime Minister Narendra Modi hming pawh a lang.
A message-ah hian Rural Development department-a contract a thawhna bill, Rs. Vaibelchhe 4 a lak turah Eshwarappa-ah hian hian ‘40 per cent cut money’ chan a tum thu leh a pawm lo a nih chuan a bill pek chhuah a nih loh tur thu an hrilh niin a tar lang.
Patil-a hi minister-in tawngka hrilh hna a thawhtir a, thla 18 hnuah pawh pawisa a la dawng lo nia sawi a ni.