Thaw rim a chhiat chhan chi hrang hrang doctorten an sawi dan hi tarlang ila. Thaw rim a chhiat chhan tlanglawn ber chu thil rim na chi kan ei leh kam kan tihfai loh vang te a ni deuh ber niin an sawi.
Mahse, thaw rim chhia (thaw uih) zawng zawng hi khitiang vang ngawt chu a ni lo tih a chiang viau mai. Chhan dang a la awm teuh mai. A chang phei chuan natna benvawn (Chronic Halitosis) eng emaw avanga lo awm te a ni thei.
Thaw rim chhiat chhan tam tak a awm thei ang a. Chûng zinga a zualpui deuh, mitin chunga lo awm fo chi 10 in kan sawi dawn nia.
Kam Thianghlim Tawk Lo
Hei hi a pawimawh ber, a vantlang deuh ber, kam rim chhiat chhan tam ber a ni. Regular taka ha nawh loh te, ha nawh pawha dang leh lei vel tih thianghlim loh te hian kam a rim chhe thei tho tho. Kam a thianghlim that tawk loh chuan hahni pân leh kam chhung lam natna chi hrang hrang a awm thei a, kam rim chhe pangai (ei in vanga rim chhia) chauh ni lovin thaw uih (kan rim chhe reh thei lo) a thlentir thei a ni.
Rim Na Chi Ei In
Purun, thil thak lam chi, thil thluma an pawlh ei in thenkhatte hian kam rim an tichhe thei. Ei ina awm particles, rim tichhe thei chu thisen hmangin chuap lamah a lo thleng ve a. Chuap atanga thaw kan thawk chhuah apiangin chû rimchhia chu a lo tel zel ta thin a ni.
Coffee
Coffee hi mi tamtak tui tih zawng tak mai a nia. Zinga coffee in hian nakin lama thaw rim a nghawng thei tlat. Coffee-a awm caffeine hian chil bawma chil insiam tur a tihtlemtir thei a. Chil a lo tlem veleh bacteria ten bu an lo khuar chak ve thung a, chu chuan thaw rim a tichhe thei.
Zu (Alcohol)
Zu inte ka rim a tui lo tih chu sawi vak a tul lo vang. A chunga kan sawi ang tho khian zu pawh hian chil bawm hnathawh a tibuai nasa hle bawk a ni.
Sugar leh Protein Tam Lutuk Ei In
Sugar leh Protein tamna ei leh inte hian kam an tichhe hma thei em em bawk. Chaw atana kan rinrawl ber (buh chang rum) hian sugar a pai tam tih hriat a ni a. Chuvangin chaw ei hnua kam thuah fai hi a pawimawh hle.
Sugar hian kam chhunga bacteria te a tipung duh a. Chuvangin a ni, thingpui thlum leh thil thlum lam kan ei hnua kan kam rim a chian loh deuh thin ni. Tin, carbohydrates tlemna lam chi ei in hian kam a tichhe duh bawk.
Meizial, Kuhva, etc
Heng meizial, kuhva, tuibur, khaini,etc te hian kam an tichhe duh hle. Tin, kam chhe pangai bakah kam chhung tan natna chi hrang hrang an thlen thei bawk.
Chaw Pai Tawihna Chak Lo
Chaw pai tawihna chak lo (pumpui chak lo, pumpui leh ril, chaw kawng lama hrisel lohna nei) chu an pumpui a balh avangin chhung lam bal, in up rim chhia kha (mi dang pawh an chhung lamah chuan an in up rim chhe vek na chungin) an ka lamah a lo chhuak tam bik a, chu chuan thaw rim chhia a siam thin.
Ei leh in, pum lamin a zawh loh vang a nithei a. Mi tam takah chuan pumpui lam hrisel loh vang a ni duh hle.
Dang Ro
Chil bawm hi a pawimawh em em a. Chil siam chhuaktuin dang tihnawng rengtu tur chil a siam chhuah tam theih loh veleh dang ro hi a lo awm thin. Hei hi mi tamtak thaw rim chhiat chhan a tling.
Eng vang nge tih chu a chung lamah kan sawi tawh a. Dang ro ( chil bawm hna thawh chak lo) hi natna chi khat angin doctor-te chuan an ngai a, a hmingah Xerostomia an ti.
Kan Damdawi Chelekte
Mi thenkhat ka rim chhiatna chhan chu an damdawi ei in vang a ni thei. Hrisel leh dam kan beisei avanga kan damdawi ei tam taka chemicals-te hian dang an tiro (chil bawm hnathawh an tihnufum) thin a, chu chuan bacteria tipungin ka rim a tichhia a ni.
Kam Rim Chhia Nia Inngaih Tlatna
Zir chiangtute sawi dan chuan khawvel mihring zaa pakhat vel (1%) chuan kam rim chhe lem lo (thaw uih ni lem lo) hian kam rim chhia niin an inngai tlat a ni awm e. Hei hi rilru lam nat chi khat a ni a, Halitophobia an ti.
Engtik lai mai pawh hian an thaw rim chhia mite’n an hria ang a, nuam lo an ti ang, tih an invengthawng reng a. Tin, an thaw rim chu midang ain chhe bik dawn niin an ngai tlat thin bawk.
Chhan Dang
A chunga kan sawite bakah hnar thi nei, ha nget, Strep hrik, thisena thlum level sang, Sjogren’s Syndrome (taksain natna a do theihna khawl tha lo) nat neih avang tein thaw rim a chhe thin bawk.