North Korea chuan ralthuam thar hlawhtling takin an enchhin tih an sawi a, hei hi a bik taka nuclear ralthuam siam chhuah a ni.
Thlalak an thehdarhah chuan an enchhin lai entu, an hruaitu, Kim Jong-un pawhin nui chungin a kut a beng.
Mi thiamte chuan tun tuma an chet dan hian North Korea-in compact nuclear weapon enchhin thuai a tum nia a lan thu an sawi.
North Korea hian kum 2017 khan nuclear a enchhin hi a lo titawp tawh.
A kum lehah Punggye-ri nuclear testing site-a an leiverh pawh a tichhia a, hei hi South Korea leh United States te nena an inpalai tawnna rah a ni.
Mahse, tun hnaia thlalem atanga thlalakah an leiverh tihchhiat tawhte hi an siam tha leh mek niin a lang.
Ralthuam enchhin thar hi hmun hla tak kap thei laipuite tihchakna tur leh nuclear ralthuam nena chetnaa hlawk zawk thlen thei tur niin an ram sorkar enkawl, KCNA news agency chuan a tar lang.
KCNA hian Kim-a chuan ram venhimna hmanrua leh nuclear ralthuamte siam zel turin a ti bawk niin a tar lang.
South Korea sipaite pawhin missile pahnih, hmun hla vak lo kap chi ni ngeia ngaih chu North atang hian Inrinni zan khan kah a nih thu an sawi.
US pawhin thil awm dan a thlithlai reng tih a sawi bawk.