Russia chuan India hnenah damdawi lam bungrua tam zawk thawn luh theih dan a dap mek.
President Vladimir Putin-a’n Ukraine a rûn avangin Moscow hi khawthlang ramten nasa takin an hrek a. Hei vang hian Europe atang leh China atanga a mamawh a lak luh thinte a tlahniam.
India leh Russia-a medical hmanraw siamtu company-te chu April 22 hian ral atangin an inbe dawn niin Association of Indian Medical Device Industry-a Forum Coordinator Rajiv Nath chuan a sawi a, India atanga an mamawh thawn an nih theih dan tur an dap dawn a. Inbiakna neih tur hi ram pahnih inkungkaihna lam buaipuitu, Business Russia pawhin a nemnghet tawh.
India hian Russia hnenah hian an mamawhte a pek ngei a rinawm a. Inlei dan tur pawh Cold War hun laia tih thin ang a nih a rinawm bawk.
Russia hi ram tam takin an hrek avangin a pawisa a khawih che zung zung thei lo va, hei vang hian Cold War hun laia ram pahnihte an lo insumdawn tawn tawh thin dan angin, anmahni pawisa ve ve hmangin an indawr a ngai dawn a ni.
Khawthlang ram tam takin an kawmserh mek laia New Delhi-in Russia hnen atanga man tlawm zawka tuialhthei a lei teuh pawhin sawi a hlawh a, United States pawhin sawisel chiah lovin tha lo a tih thu leh Moscow laka inlahrang tura a duh ve thu a lo sawi tawh.
Nath chuan India hi tun dinhmunah chuan Russian sumdawnnaa a fawng chelhtu pawimawh ber a nih mek thu leh he rama a thawn chhuah pawh kuminah hian a hma kum aia a let 10 dawna tamin Rs. tluklehdingawn hnih zet a tlin a rinawm tih a sawi.
India-Russia inkungkaihna
Cold War hun lai atang khan India leh khatih laia Soviet Union (USSR) kha sipai, eibar leh inpalai tawnna lamah an inkungkaihna a thuk hle tawh a. Soviet Union a kehdarha Russia a din chhuah leh hnuah pawh inkawmngeih zui zelin ram pahnihte hian an inkungkaihna chu ‘bik tak leh kal dan phung nghet tak neia inkawmngeihna’ tiin an sawi ve ve thin.
Ram pahnihte inkungkaihna hi thuang lian tak tak panga – politics, ram venhimna, civil nuclear energy, firfiaka chete beih letna leh van thengrenga hmalakna lam tia sawi leh then thin a ni.
Tun hnai kum eng emaw ti atang khan huang dang, sumdawnna lama inkungkaihna chu a lian thar hle bawk a. Ram pahnihte hian an inkara sumdawnna sum che vel hi kum 2025-ah chuan $ tluklehdingawn 30 tlinpui an tum a, hei hi kum 2017 kha chuan $ tluklehdingawn 9.4 chuah a la ni a, hmasawn an tum hle.
India hi Russian ralthuamte leisaktu tam ber dawttu ram a ni a. Kum 2017 khan India-in ram dang atanga ralthuam a lei 68% zet chu Russia atanga a lei a ni nghe nghe.
India hian Moscow-ah embassy neiin consulate-general pahnih (Saint Petersburg leh Vladivostok) a nei bawk a. Russia pawhin New Delhi-ah embassy neiin consulate-general paruk (Chennai, Goa, Hyderabad, Kolkata, Mumbai leh Thiruvananthapuram) a nei bawk.