Serchhip bialtu MLA, Lalduhoma chuan a bial chhunga MLA Fund hmanna tam zawk chu tha tak taka thawh a nih avanga lawmthu sawiin, “MLA Fund chu mipuite ta a ni a, dik taka hman chuan hna tam tak a thawh theih a ni,” a ti.
He thu hi nimina Serchhip Vengchung Branch Mizoram Upa Pawl (MUP)-ten MUP Rûn an sak a hawnnaah Lalduhoma hian a sawi a. Covid-19 leng avanga tum dang anga MLA Fund an indaih loh thu leh dilna lut zawng zawng a daih vek tak loh thu te, a daih chin chinah hman a nih thu sawiin, “Ka bial chhunga MLA Fund hmanga hnathawhte chu a chhe tur a ni lo,” tiin, MUP Rûn tha tak an nei ta chu a lawmpui thu a sawi.
Lalduhoma hian Serchhip district-ah sum tam tak senga hnathawh, hman zui tak loh eng emaw zat a awm thu pawh a sawi a. Tul loa pawisa tam tham tak luan ralna uiawm tak a ni tih a sawi a. Heng zingah Slaughter House, Cold Storage bakah Nursing School te hman zui tlak loha a awm thu te, Chhiahtlang-a Polytechnic sak te pawh a puitlin hleihtheih loh thu a sawi bawk.
Serchhip bialtu MLA hian sum Rs. vbc. 21 chuang senga District Hospital building thar sak a nih tur thu te, bye-election laia sorkarin a tiam chu tun thlengin Govt. Serchhip College building sak thatna tur sum an la dawn loh thu leh tun hnaiah Chief Minister Zoramthanga’n NAAC Grade ‘A’ Acreditation an hmuh a lawmpuina a Rs. nuai 600 chuang building thar sak nan a tiam leh ta chu an hmu ngei tawh tura a ngaih thu a sawi.
Serchhip Vengchung Branch MUP-ten MUP Rûn an sak hi health department ram chhungah niin, building sakna atan hian bialtu MLA hian MLA Fund atangin Rs 4,00,000 pein, Rs. 4,61,987 senga sak a ni a. A ban leh beam RCC-a sak a ni a, a bang atan tile leh a chung atan rangva hman a ni thung.