South Korea lirthei company tha leh lar tak Hyundai chuan India rama an midsize SUV lei hlawh tak Creta chu 2022 model tichhuak tawh tho mahse kum kumtawp lamah chuan a facelift model, tuna ramdanga 2023 Hyundai Creta chhuak mek ang, facelift model chu an tihchhuah leh beisei a ni.
Hyundai hian kum 2022 chhungin SUV pali tihchhuah an tum a niin a lang a. Hengte hi Venue facelift, Kona EV facelift, Creta facelift leh new-gen Tucson SUV a ni dawn a ni. Sawi tawh angin 2023 Hyundai Creta facelift hi international market thenkhat Thailand, Indonesia leh hmundang thenkhatah te an tihchhuak tawh a ni.
2022 facelift Creta?
Tarlan tawh angin Hyundai chuan tuna Creta chhuak mek hi an tihchhuahna a la rei lo hle a. A design hi a chhuak hmasa ber te nena khaikhin chuan a mawi lehzualin a changkang khawp mai a. Tunah hian 2022 facelift model hi tuna chhuak mek nghahchhan tho hian Hyundai in an tichhuak leh dawn niin report hrang hrang a awm leh ta nual a ni. Hyundai lam atangin official-a puanzar a la awm lo na a, a dik ngei te pawh a rinawm a. Tuna chhuak mek nghahchhan leh a aia danglam tam lutuk loin an tihchhuah hmel a ni.
Design lam
International market-a chhuak mek tawh nena khaikhin chuan tuna chhuak mek ai hian Creta thar tur hi a danglam ve hret hret dawn a. A hmabawr hi a thar hlak, Tucson thar nena thuhmun deuh a nei dawn a. Hyundai atanga thil thar Sensuous Sportiness design language an tih chu a lirthei pianphungah hian kan hmu dawn a ni. Creta thar turah hian Hyundai atanga thil thar bawk – ‘parametric grille’ LED DRLs (Daytime Running Lamps) mawi taka awm tel nghal bawk chu a hman dawn hmel bawk a. A DRL thar tur hi a lirthei a thihin a grille-a tel ve ang chiahin a lang thei a ni. A headlamp pawh a bumper-ah hniam hretah a awm a, a bumper pawh design thar niin boruak luhna, air-inlet pawh a hma aia sin leh arh zau siin duan a ni bawk a ni, heng hoah hian silver finish a awm hlawm bawk a ni.
A sir lam pawh tuna chhuak mek nen a inang viau a. A hnung lamah chuan tailgate design thar, leh LED light thar te a awm a. A laia LED bar phei ruak kha a hnung bawrah hian Hyundai chuan an rawn dah chhunzawm dawn lo niin a lang.
A chhunglam
A chhunglamah chuan tuna chhuak nen a la inang viau a. Hetihrual hian 10.25-inch digital instrument console thar a rawn nei dawn thung a, hei hi tuna chhuak mek Alcazar-ah pawh a hmang a ni. Hyundai BlueLink connected car technology update thar a rawn nei tura ngaih a ni a, hei hi rukruk leh himna tur thil hrang hrang hmanrua tha tak a ni. Heng bakah hian 10.25-inch touchscreen infotainment system with Android Auto & Apple CarPlay, ventilated front seats, panoramic sunroof, air purifier leh thildangte a rawn nei bawk ang a.
Creta thar turah hian Advanced Driver Assist System (ADAS) a awm tawh beisei a ni a. Hei hi kan lo tarlan fo tawh angin himna lama puitu tur a nih mai bakah a khalhtu tana lirthei khalh a nawm theihna tur leh thunun tur hrang hrang awlsam lehzuala tih theihna tur hmanraw changkang tak, lirthei man to leh changkangah chiah hmuh thin a ni a. Heng thil hrang hrang lane keep assist, blind spot detection, adaptive cruise control, autonomous emergency braking with forward collision avoidance leh rear-cross traffic collision avoidance assist te hi a ti thei dawn a ni.
A khawl
Hyundai Creta facelift lo chhuak tur hian a khawl lamah chuan danglamna lutuk a rawn neih hmel loh a. Khawl chi thum – 113bhp pechhuak thei 1.5L Naturally Aspirated petrol, 113bhp pechhuak thei 1.5L turbo-diesel leh 138bhp power pechhuak thei 1.4L turbocharged petrol te a la neih hmel a ni. Transmission lamah pawh danglamna a awm lo ang.
Hyundai atangin he lirthei thar tur leh an SUV thar tur dangte pawh hi official-a puanzar a awm thuai turah beisei ila. Chiang zawk leh dik famkim zawk te pawh kan hre thei thuai ang a, Hyundai atangin lirthei chi thar changkang leh him, mawi bawk si kan hmu leh thuai dawn niin a lang.