Aizawl: Vairengte pa, mi bo, Thinlaihnema zawn mek a ni.
Thinlaihnema hi Vairengte Hall venga mahnia khawsa a ni a. Chawlhkar khat chhung vel a inah hian a awm tawh lo a. A thenawmte ngaih tha lo chuan a rukin an zawng tawh a, an hmuh mai loh avangin Thawhtanni atang khan Vairengte Joint YMA huaihawtin zawn hna chu thawh tan a ni.
Mibo zawngtute hi group hrang hrangah insiamin Vairengte chhuah lam – Saiphaiah te, Vairengte tlak lam Bilaipur leh a chhehvelah te, Chhim lamah Bilkhawthlir leh a chhehvel bakah Bagha leh a chhehvelah te zawn a ni.
Thinlaihnema hi rilru lam fel lohna nei nia sawi a ni a, khaw chhungah pawh kea kal ngat ngat thin a ni a, amah hrechiangtute chuan ram lamah chuan a kal ngai lo niin an sawi.
Nilaini khan Thinlaihnema hi Jelangat Mualtluang (Cachar)-ah an lo hmu nia sawi a awm a, a riltam tawh avangin chawte an eitir a; amaherawhchu, mi bo tih an hriat loh avangin an kaltir leh mai nia sawi awm chu bawhzuiin nimin khan Vairengte thalaite chu an liam leh bawk.
He thu buatsaih lai thleng hian Thinlaihnema hi hmuh a la ni lo.