NABARD (RIDF-XXIV) sum Rs. nuai 1261.78 senga siam, Raifan lui atanga nizungchakna hmanga Sialhawk khaw chaw- mna tur tuilakna -Sialhawk water supply scheme- chu nimin khan PHE deptt. changtu, Deputy chief minister Tawnluia’n a hawng.
Sorkar thuchhuahin a tarlan danin, Sialhawk water supply scheme (Solar pumping)-ah hian PHED/ Gangwal Engineering & Construction company te chu implementing agency niin, August ni 19, 2019 ah hna tanin, May ni 31, 2022 a zawh hman tura ruahman a nih laiin, September ni 1, 2021 khan tui pump chhuah theiha siam a ni tawh a, tui connection 520 pekchhuah tum a ni.
Mi pakhatin nikhatah tui litre 55 zel hmang anga chhutin, mi 3212 te kum 30 lo la awm leh tur thlenga chawmzo tura chhut a ni a. Nikhata darkar 7 chhung tui pump thei tur leh nitin tui litre 2,12,000 pump thei tura duan niin, tui pump chhuah te chu tuizem litre nuai 3 dawnga dahluh a hnih hnuah khaw chhungah semchhuah a nih thu sorkar thuchhuah chuan a tarlang.
Tui pump chhuah nan pumping station 4 siam niin, a vaiin so- lar power plant kilowatt 243.1 bun a ni a, hemi atan hian solar plate 748 dah a ni. Tuidahkhawlna leh thlitfimna RCC sump 4, litre 2,80,000 da- wng pakhat leh litre 40,000 dawng 3 dah niin, control room 4, chowkidar quarters, site office leh a panna kawng pawh siam a ni a. A enkawl hna chu department enpuina hnuaiah Village water & sanitation committee kutah a awm ang a, contractor ten kum 5 chhung servicing an ti dawn niin sorkar thuchhuah chuan a tarlang bawk.
Sialhawk water supply scheme hawngtu Dy CM chuan tui harsatna khua Sialhawkin hnianghnara tui an dawn theihna tura tuilakna thar hawn a ni ta chu lawmawm a tih thu a sawi a. Nizung chakna emaw, gravity leh tuldangte hmangin bial chhung khuate tui hnianghnar taka pek kim vek a nih thu a sawi.
Tawnluia chuan Rs. vbc 25 sengin Khawhai water supply scheme pawh siam tum a nih thu leh hemi kaltlang hian tuitlan mai bakah Khawhai khaw chung dil leh a vel cheimawi hnathawh tum a nih thu a sawi a. Khawdangahte pawh tuilakna thawh mek a nih thu leh la thawhlohna khuaahte pawh ruahmanna siama kutthlak thuai tum a nih thu a sawi bawk.