Aizawl: Agriculture Minister C. Lalrinsanga’n Farmers Interest Group (FIG) account intawma sum lut tawh atangin Rs 1,00,000 zel department kaltlangin a hnena pe kir leh turin ti.
Serchhip ni tin chhuak chanchinbu, Laisuih-in a tar lan danin, Fostering Climate Resilient Upland Farming System (FOCUS), Serchhip hnuaia lo neitute hman tur tui zem lian pakhat zela siamna tur, Rs 5,00,000 theuh FIG joint account-a lut tawh chu agriculture minister-in Rs 1,00,000 zel department kaltlangin a hnena pe kir leh tura a tih thu a tar lang.
Laisuih-in thu an dawn dan chuan minister hian heng hnate hi a duhsak zawngte thawhtir a duh a; mahse, dan angin FIG account-ah pawisa a lo luh fel vek tawh avangin Rs 1,00,000 theuh dah kir leh mai turin a ti a. Heta tan hian FIG hruaitute chu ko khawmin, thil awm dan hrilh an ni tawh a, hetiang hi a nih takah chuan tuizem (tanker) an siam tur pawh a nihna tur ruahman lawk aia tê deuha siam mai a tul tur thu hrilh an ni.
Pawisa hi FIG-ten a hmasa ber atan nimin khan hnathawh nan Rs 2,00,000 an la chhuak phawt dawn a ni.
FIG group hi 20 vel awmin, sum a lut vek a nih chuan group tin dawn tur atanga pawh kir a nih chuan a vaiin Rs. nuai 20 vel a ni dawn a. Hnathawhna tur leh thawktu hi thlan fel a nih tawh avangin sum pawh kir tur hi eng atana hman tur nge tih hriat a nih tak loh thu a tar lang a ni.