Kolasib-ah vawk 200 chuang thi, ASF vang a nih ring lo

Aizawl: Kumin March atanga April nimin thlengin Kolasib district-ah vawk 200 chuang an thi tawh a. Vawk thih chhan ber hi finfiahna la nei chiah lo mah se, African Swine Fever (ASF) ni loin tun hma a\anga hri leng lo awmsa tawh, Classical Swine Fever a nih rin a ni.
ASF hri leng vangin Mizoramah vawk tam tak a thih laiin, Kolasib district a vawk vulhtu tam zawk chuan ASF avang hian harsatna an tawk em em lo nia sawi a ni. Hetih lai hian, tun laiin Kolasib khawpui chhungah vawk thi a tam hle a, vawk vulhtute sawi danin vawk thi hi 200 chuang a tling tawh a ni.
Animal Husbandry & Veterinary dept hotute sawi danin, Kolasib khawpui chhungah hian kumin March thla atanga vawiin thlengin vawk thi report hi 138 an tling tawh a, in report lo pawh thahnem tak an awm nia hriat a ni.
District Vety dept hotute hian, vawiin thlengin sample an lak zingah ASF positive hmuh a la nih loh thu an sawi a. Heti chung hian, an tihdan pangngaiin kuminah pawh vaccination campaign kalpui reng niin, vaccination rules-ah vawk rai lai leh vawk note chu vaccine pek ve loh tur a nih avangin, tun laia vawk thi pawh hi vaccine pek ve theih loh vawkpui leh a note deuhte an ni tlangpui a, laboratory-ah finfiahna la nei thei chiah lo mah se, vawk thih dan an thlithlaina atangin tun laia vawk thih chhan ber chu ASF ni loin, tun hma atanga hri leng lo awmsa tawh Classical Swine Fever a nih an rin thu an sawi a. He natna hi a hun taka enkawl a nih chuan vawk nunna chhan theih a nih thu an sawi bawk.
Tun dinhmunah Kolasib khawpui chhunga vawk vulhtu eng emaw zat chuan ni tin deuh thaw vawk an chân a, hetianga an vawk an chan tak hlutzawng hi a tlem thei ang bera chhut pawhin cheng nuai 50 chuang man a ni tawh a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427