Russia-in Luhansk 80% thunun tawh : Ukraine

Ukrainian thuneitu sang chuan an ram khawchhak lam, Donbas-a Luhansk chu Russian sipaiten 80% zet an thunun tawh niin a sawi a. Damdawi in leh ruang dahna hmunte chu a khah hneh hle niin a sawi bawk.
Luhansk governor, helai biala sipai lama thuneihna sang ber neitu ni bawk, Serhiy Haidai chuan Telegram hmangin an dinhmun hi Nilaini zan tlai tawh takah khan a puang.
“Kreminna atanga kan sipaite an inhnuhdawh hnuah khan 80% zet an luah tawh a ni,” tiin Haidai chuan a sawi a. Russia hian Luhansk-a khaw tereuh tê pawh Thawhlehni khan an la niin a sawi.
February 24-a Russia-in Ukraine an rûn hma kha chuan Ukrainian sorkar hian Luhansk hi 60% vel an thunun thin a. Tun hnaiah Russian sipaite hian Ukraine khawpui ber, Kyiv an thunun theih loh hnuah khawchhak lam hi an nawr na zual a ni.
Kum riat kal ta chhunga Moscow-in a puih inlak hran tum pawlten an thunun, Donbas lak hi Russian President Vladimir Putin-a’n thla hnih zet chhunga khawpui ber lak tuma a beiha a theih loh laia helai lak hi a tan hlawhtlinna a ni.
Donbas-a Luhansk leh Donetsk region hi Russian tawng hmang an tamna niin lungalhthei khur, metal plant leh hmanraw lian chi siamna factory tamna a ni a. Russian hruaitute chuan heng hmun hnih hi ram indang angin a lo puang tawh a, Ukraine an rûn hmaa an puan kha a ni tawh nghe nghe.
Haidai chuan Russian-te hian Luhansk an kah nasat em avangin mipuite tan bomb shelter atanga hmun him dang pana chhuah ngaihna pawh a awm lo niin a sawi a. Kreminna an lak hnuah rûntute hian Rubizhne leh Popasna khua an hnaih leh mek niin a sawi.
Khaw hnihte hi tunah pawh Russian-ten an thunun a ni thawthang tawh a; mahse, Ukrainian sipaiten an la bei let ve reng a, eng hunah pawh thil danglam thut thei reng a nih thu a sawi.
“Russian-te hian Ukrainian-te indanna hi paltlang an tum hle a, an la hlawhtling lo,” a ti a. Luhansk-ah hian hmelma ruang a let remrum niin a sawi bawk.
“Ruang dahna in leh damdawi inte a khat vek,” a ti a, Russian-te hian Ukrainian-te chenna in rawkin an car-te pawh an khalh chhuahsak niin a sawi bawk.
Donbas-a mi tho, Donetsk-ah pawh indona a la nasa hle a. Lawngchawlhna khawpui, Mariupol-ah Ukrainian sipai leh civil miten steel plant lian tak chu an veng bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427