Jharkhand High Court chuan Zirtawpni khan Rashtriya Janata Jal (RJD) chief Lalu Prasad Yadav chu Doranda Treasury scam an tih, Rs. vaibelchhe 139 a ei ruk thubuaia kum nga tang tura tihnaah bail-in a chhuah.
Bihar chief minister hlui hi CBI special court-in thiam loh a lo chantir tawh a ni.
Kum 73 mi, Lalu Yadav-a hi ran chaw leina sum, Doranda treasury atanga la chhuaka ei ruk thubuaia February thlaa CBI court-in thiam loh chantira a hremna a puan atangin a tang.
“Jharkhand High court chuan kan dilna pawmin bail a phal a. Kum nga tan tura a zahve a tang tawh a, thla 41 chhung tan inah hun a hmang tawh a, trial court-in a nemnghehna pawh kan thehlut a, court hian bail a phal ta a ni,” tiin a aiawha ding, Prabhat Kumar chuan news agency PTI a hrilh.
High court thupek hi Thawhlehniah court hniam zawka thlenin sawi leh a ni ang a, bail bond thehlutin chhuah a ni dawn tih Kumar chuan a sawi bawk.
Bihar chief minister hlui hi kum nga tan bakah Rs. Nuai 60 chawi turin ran chaw leina thubuai pangana, Doranda treasury atanga pawisa lak chhuahah hian Ranchi-a CBI court chuan a hrem.
Lalu Yadav-a hi CBI court hian February 15 khan thiam loh a chantir a. February 21 khan kum nga tang tur leh pawisa chawi turin a hrem.
Thubuai hi Bihar thendarh a nih hma, chief minister a nih laia ran chaw leina thubuai niin treasury hrang hrang panga atangin sorkar sum tam tham tak a ei ru nia puhin thiam loh chantir vek a ni a. Doranda treasury atanga sum lak chhuah hi panga zinga pakhat a ni.