Premier League a inhamtan hram tum Burnley in tun season a an khelh that ber tum nia ngaih theihin football an khel a, an mikhual Southampton lakah 2-0 in hnehna an chang.
Ningani zanah Turf Moor a Premier League inkhelah Clarets hian an coach hlun tak Sean Dyche an ban hnuah a vawikhatna atan hnehna an chang a. Tun season-ah league-ah vawi nga an chakna chauh niin 18-naah an awm a, 17-na a awm Everton nen an inkarah point khat chauh a awm.
Minute 12-naah Connor Roberts chuan club tana a goal hmasa ber mawi takin a khung a. Halftime dawnah Nathan Collins chuan an goal hnihna a tauh lut a. Burnley goal pahnihte hi Josh Brownhill siamsak ve ve a ni.
Interim manager Mike Jackson hnuaiah Burnley in attacking football fakawm tak an khel a. Second half-ah Saints in nasa zawkin beihlet an tum a, Sean Dyche hnuaia an nghehna leh tlona an larpui ang kha an lantir leh bawk.
Jackson chuan, “Player leh staff leh fans te tan result tha tak a ni a, hun harsa kan tawh laiin player-te an tangrual tlat a, an theihna pholan tumin an insawrbing tha hle.” tiin inkhel zawhah a sawi.