Ze nghet neih te, mahni nihna anga lan ngam te a pawimawh : Robert Romawia

ICFAI University-in nimin khan Durtlanga an campus-ah farewell program leh IUM Virtual Fest Lenlai 2022 kharna hun an hmang a, Sports & youth services minister Robert Romawia Roy- te-in a hmanpui.
Sports Minister chuan ze nghet neih te, mahni nihna anga lan ngam te a pawimawh thu sawiin, Mizo zingah hetiang mi entawntlak tam tak an awm thu leh midangte tana malsawmna ni tur leh eizawnna kawngah pawh mihlawhtling ni tura teirei peih a tul thu a sawi a. Taimakna leh tumruhna tel lovin mihlawhtling a nih theih loh tih hre thar leh turin zirlaite a fuih.
Robert Romawia chuan changkanna tehfung pawimawh tak literacy-ah Mizoram a sang hle chu mahni inrintawkna petu ni se a duh thu sawiin, zirna sang tak post graduate degree nei thei hiala pass chhuakte chu chapo- pui tur ni lovin mahni inrintawkna petu ni se a duh thu a sawi.
ICFAI vice chancellor Prof RP Vadhera nen education hmasawnna tura hun rei tak an lo thawh dun tawh thu pawh Robert Romawia chuan sawiin, Mizoram University atanga a chawlh hnuah Mizo thalaite a hmangaihna avanga ICFAI-ah vice chancellor nihna a chelh chhunzawm chu ICFAI mai bakah Mizoram tan lawmawm a tih thu a sawi.
S&YS minister chuan “Mizoram state-ah MZU leh ICFAI lo university kan nei rih lova, general line-a post graduate zirna tur mamawh em em zirlaite tana course hrang hrang zir theihna ICFAI-in Mizoramah zirna in tha tak an din chu Mizoram tan malsawmna a ni” a ti a. Post graduate degree nei tharte chu sorkar hna chauh ni lo, eizawnna tlak hnathawh tur tam tak a awm thu hrilhin, theihtawp chhuah tur leh thawh hreh nei lo turin a fuih bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427