School Education Minister Lalchhandama Ralte chuan academic session kal mek atangin ‘Zo Nun’ tih zirlaibua telh a ni tur chu zirlaiten an tangkaipui ngei a beisei tih a sawi.
Nimin khan a pisa-ah MAL Book of the Year 2021 ‘Hnam Ropuite u, Tho R’u Le’ tih, Lalhruaitluanga Chawngte ziah lawmpuina hun a buatsaihah Lalchhandama Ralte hian hian thu sawiin, zirlaite hian ‘Zo Nun’ tih zirlaibu an zir dawn a, he zirlaibuah hian Mizo nuna thil entawntlak te, Mizote thuam leh mi chhuanawmte chanchin hrang hrang, zirlaiten hnam rilru an put theihna turte a awm a. Heng hi zirlai zawng zawngin an zir dawn a, an tangkaipui ngei a beisei thu a sawi.
Lalchandama Ralte chuan Book of the Year atana thlan tak chungchang sawiin, “Mizo hnam ropuina, kan duai bik lohzia, mi kan an phak piah lamah kan chungnunnate pho langin, hnam kan nih anga lawm a, inchhuang a, he hnam ropui nana ke pen zel tur kan ni,” a ti.
‘Hnam Ropui Te U, Tho R’u Le’ tih lehkhabu hi mi tinin chhiar se, a bikin naupang leh thalaiten chhiar nasa se a duh tih a sawi a, “Mizote kan thatna leh kan nunziaa a chhuanawm lai pho lanna a nih avangin, Mizo zirlaite nun kaihhruaina atân a tam thei ang berin an chhiar a tul a ni,” school education minister-in a ti bawk.
Book of the Year 2021 lawmnaah hian RD Minister Lalruatkima leh a ziaktu, Lalhruaitluanga Chawngte pawhin thu an sawi a. He hunah hian mi pawimawh dangte an tel bawk a ni.