Traffic light hmangin kawng kan kan ve dawn tawh ang em?
Hawn a nih atanga kum hnih dawn a vei hnuah pawh traffic light hmanga kawng kanna, pelican crossing chu vawiin thlengin hman tangkai a la ni lo a, a sum sen zat ngaihtuah phei chuan insen thlawnna a ni mai ang tih a hlauhawm hle.
Pelican crossing hi July 17, 2020 khan hawn ni tawh mah se a nih tur angin hman a la ni lo a, Rs. 22,17,810 sen ralna hi tangkai takin mipuiin an la chhawr lo a ni. Aizawl Smart City Ltd. hmalaknaa bun hi mipuiten him zawka kawng an kân theih nan siam a ni a, hetih lai hian a enkawltu tur traffic police-te an indaih tawk loh vangin a nih tur angin hman a la ni ta lo a nia thudawn a ni bawk.
Hetih lai hian Rs. 22,17,810 sen ralna hi deputy chief minister-in a hawn hma khan pelican crossing chungchangah sorkar chuan thuchhuah a siam a, “Pelican crossing awmna hmun bikahte hian a bula traffic duty-te kaihhruainaa kawng kân thin turin Mizoram police chuan mipuite kan ngen,” an ti a, hman tangkai zui a ni lovin, kaihruaitu bik an awm lo chhunzawm ta a ang hle.
Hetia en mai hi chuan sorkar in tul lovah sum a seng thlawn ni berin a lang a, chhuanlam tur leh puh tur ting chu a la awm ngeiin a rinawm; mah se a tak taka kaihruaia hmang turin kan la inpeih lo hle ni pawhin a hriat bawk.
Lirthei a pung zel a, traffic police lam an indaih lo chho viau a lo ni a nih pawhin sorkar hian ruahmanna siam zung zung mai se la, thil tha tih kawngah changkan ve zel i tum teh ang u.