Siaha district tana hmasawnna tur hmachhawp hrang hrang thawh turah state sorkarin a tum ve tur (state matching share) pawh Chief Minister Zoramthanga hoa hna thawh theihna tur chuan MADC-a MNF party candidate-te thlan tlin a ngaih thu MNF Adviser Dr R Lalthangliana’n a sawi.
Mara Autonomous District Council (MADC) inthlanna neih tura campaign beihpui thlaka hmun hrang hrang tlawh meknaa thu sawiin MNF Adviser Dr R Lalthangliana hian, “State sorkarin council area-ah kan sangawi zawnpuite an sorkar chuan department hrang hranga hmalaknate dawhkan khatah kan kilpui thei dawn a, kan duh tak kan fahrinte an sorkar chuan a enkawl dan a danglam bik hle dawn a ni,” a ti.
Minister Dr R Lalthangliana chuan Siaha district-ah thil tam tak tih tur hmachhawp a awm thu leh project chi hrang hrang thawh turah state sorkarin a tum ve tur (state matching share) pawh chief minister hoa an tih theihna tur chuan tuna an candidate-te thlantlin a ngai tih sawiin, “Hmasawnna danglam tak in hmu dawn a, kan duhzawng tak in tih chuan in duhzawng tihsak che u hi kan bat ve a ni tih kan hria. MNF candidate in vote chuan keimah leh Pu Zoramthanga sorkar in vote tihna a ni ang,” a ti bawk.
Congress party an tla tluang hle zel a, tun hnaia state panga inthlanah an tla fai vek tih sawiin, “Central lamah an hniam rawih rawih a, an tla zar zar zel a. Mizoramah pawh sorkar tur chuan beisei ngaihna a la awm lo,” tiin Congress party chungchang a sawi.
ZPM party pawh sawi langin, “Party mumal lo, tin ruak khawn rik ang chauh an ni a, a chhungah engmah a awm lo a, beisei tur awm reng reng lo a ni. Social media leh a phaw vuakah an inpho nasa vel mai mai ringawt a, thawm chang an tina a, a chhungah an kawrawng hle,” tiin, nakum inthlanpuia state-a sorkarna siam leh mai tur MNF-ten an thawhpui theih tur MNF MDC candidate-te hi thlang tling turin a chah bawk.