Social Activist Vanramchhuangi’n Mizoram kaltlanga dan lova kuhva rah tawlh chungchangah nimin khan Gauhati High Court, Aizawl bench-ah Public Interest Litigation (PIL) a theh lut.
Gauhati High Court-a Writ Petition Criminal PIL an theh luhah hian dan lova chhiah chawi si loa ramri kâna sumdawnna lian tak awm chu CBI chhui an ngiat thu te, dan lova khawchhak atanga kuhva sumdawnna kalpui a nih avanga Mizoram khawthlang lama Mizo kuhva chingtuten harsatna an tawh thin tihreh a nih theih nana hmalakpui tura zualkona te tar lan a ni.
Vanramchhuangi chuan PIL a theh luh chhan The Zozam Times hrilhin, “Dan lova ramria sumdawnna vir velin ram ei leh bar a tihchhiat chungchangah Champhai Police station-ah FIR ka theh lut a, reject a ni a, chief minister hnenah memorandum kan theh luhin awmzia a nei lo bawka PIL ka theh lut ta a ni,” a ti.
Prime minister hnenah dan lova kuhva rah tawlh chungchanga memorandum a theh luh erawhin awmzia a nei nia a hriat thu sawiin, Assam sorkarin dan lova kuhva rah tawlh nasa taka a dote chu a memorandum theh luh nghawng nia a ngaih thu a sawi.
Chief minister hnena memorandum a theh luh chungchang sawiin, “A tirah khan ka lawm viau a, high level meeting-te pawh koh a ni a. Mahse, kuhva rah tawlhten kawng ruk an zawh thin laia memorandum ka theh luh zana zalen taka kawng pangngaiah kaltir an ni kha a rilru nat thlak,” a ti bawk.