Bollywood star Shahid Kapoor channa film thar, ‘Jersey’ chuan box office lamah lawmna tur a nei tlem tial tial a, karkhat a liam meuh chuan cheng vaibelchhe 20 tling lo a lalut thei hram.
Beiseina sang tak nena tlangzarh ni mah se, ‘Jersey’ hian elpui pakhat a nei miau a, engtinmahin a tawn tlang zo lo. Hripuiin kiam lam a pan vanga mi tam takin Cinema Hall an pan sup sup mek lai hian ‘Jersey’ hian ngainat leh ngaihzawn a hlawh lem lo, a tih theih ang.
Chutih rualin, KGF: Chapter 2 erawh chuan karhnihnaah movie ngainatute duhthlan leh pan chat a ni chhunzawm zel a, vaibelchhe tam tak a la lut hiau hiau mai.
Karleh lamah hian festival lian tham a awm chho dawn a, hei hian nasa lehzualin mipui a kokhawm belh ngei tura beisei a ni.