Aizawl: State hrang hrang sorkarin ‘good governance’ an kalpui vek tawh laiin MNF kaihhruai Mizoram state sorkar erawh chuan eirukna nasa tak vanga hmasawnna policy a kalpui mumal theih loh thu Union Minister for Minority Affairs John Barla chuan a sawi.
Mara Autonomous District Council (MADC) inthlan lo awm tura BJP party tana campaign neia Mizorama cham mek, Barla hian nimin khan Siaha Bazar-ah vantlang inkhawm buatsaih chu a hmanpui a. He hunah thu sawiin, “PM Narendra Modi sorkar leh state hrang hrang sorkarte chuan good governance an kalpui vek tawh laiin, Mizoram state sorkar erawh chu corruption nasa tak vanga hmasawnna policy kalpui mumal thei lo, minority area tan liau liaua minority affairs hnuaia sanction pawh chuhpui duh leh lo tikhawtlai duh khawpin good governance an hlat a ni,” a ti.
MNF sorkar chungchang sawiin Barla hian, “Central atanga Mara mipui tana kan pek nuaih singli dawn mi tlem tê sum siam nan an hmang a. SEDP-ah Rs. nuai hlir 2,36,300 dah tawh chungin mipui sem phal leh si loin mi tlem tê thawhna tur contract hnathawh nana hmang duh MNF vote kan pek chuan corruption kan do lo tihna a ni dawn a ni,” a ti a. Nakkuma Mizoram inthlanpui lo awm tura Mizoram tana sorkar inrelbawlna entawntlak hmahruaitu ni turin Mara mipuite an pawimawh tih a sawi.
Union Minister hian minority-te enkawlna bik Sixth Schedule hnuaia thuneihna sang zawk nei tura dan siam tha tura hmalakna bul tan na’n Mara mipuiten BJP min Vote turin kalkhawm mipuite sawmin, MADC inthlanah BJP in hnehna an chan a beisei thu leh a rin thu a sawi bawk. Sorkar laipuia Minority Affairs hnuaiah mipuite hamthatna tur leh hmasawnna tur scheme leh project kalpui tam tak zingah thlir bik leh en bikah education, health care, mipuite ei leh bar thawhchhuah theihna tur leh thalaite hnathawhna bakah thiamna nei tura training lam hawi a nih thu a sawi a. He’ng te tihlawhtling turin a enkawl ministry in Mara mipui tan project tha tak an duan tur thu leh Autonomous Council sorkar thar piang tur hi thlir bik bik neia ruahmanna felfai tak nei turin a chah a ni.