ASF Leng: Farkawnah Rs. Nuai 123 man thi tawh

Vawk pul hri, African Swine Fever (ASF) vangin Mizoramah vawk thi a awm belh zel a, Farkawn khuaah Rs nuai 123 man hu vawk a thi tawh a; loan laa vawk vulhtute an mangang tawh hle.
Champhai district chhunga Farkawn khawtlang hruaituten The Zozam Times an hrilh danin, kumin March thla tir atang khan Farkawnah hian ASF vangin vawk a thi tan a, nimin thleng khan vawk 429 a thi tawh a. Vawk thite hi vawk puitling vek tawh niin, tualchhung sa rate angin Rs nuai 123 man hu vela chhut a ni.
Farkawn khuaah in 720 vel awmin, in 300 vel te chuan self help group kal tlang leh national loan hmangin vawk vulah eizawnna tur atan loan an la nasa hle niin thudawn a ni a, Farkawna Mizoram Rural Bank atanga loan an lak hi Rs nuai 600 vel a ni.
Loan laa vawk vulha bul tante dinhmun chu a ngaihtuah awm thu khawtlang hruaitute chuan sawiin, “Zangkhai zawk deuha loan an rulh theih nan sorkarin hma lak sak thei se kan ti hle,” an ti.
Khawzawlah pawh vawk thi a pung zel a, tun hnaiah vawk thi 119 a awm tawh a. Khawzawl khaw chhungah hian ASF hrikai vawk 15 chu Thawhtanni khan suat leh a ni a, Khawzawl khaw thenawm Chawngtlai khuaah pawh vawk thi awmin ASF anih leh nih loh enfiah mek a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427