Naupang mit tha lo, tarmit vuah ngai an tam
Kum hnih dawn hri leng vangin zirna kalpui that theih a ni lo a, zirlaite pawhin online-a zirna kalpuiin, phone leh TV an en nasat phah hle. Hei hian nasa taka an mit lamah natna thlenin, zirna pangngaia kalpui leh a nih hnuah naupang zingah mit tha lo, tarmit vuah ngai an tam phah hle.
Hei hi doctor thiamte thusawi a ni a, mit lam doctor te pawhin an en tam pawl leh tarmit an chawhsak tak an tam hle tih an sawi. Tin, doctor te hian naupang nu leh pate hian an fate an lo chik tawk lo hle tih an sawi a, kan fate nungchang leh dinhmun kan enfiah thiam fo hi a ngai hle a ni.
Civil Hospital, Aizawl a Eye OPD pantu an chhinchhiahna atanga a lan danin April thla chhunga ni tina OPD pantu zinga zaa 20 atanga 30 inkar chu zirlai naupang an ni a, tarmit chawh ngaih phah an tam hle bawk.
Doctor te hian tun hnaiah naupangte hi an mit a chhe ta thut a nih an rin loh thu sawiin, zirlai naupang tarmit vuah tura chawhten power sang takte an lo mamawh tawh tiin, nu leh pate pawhin an fate hi an lo chik tawk lo nia a lan thu an sawi a. Tin, tunlaia naupang inawmtleina ber chu phone a nih tawh miau avangin phone inkhawihtir loh tawp chu thil harsa a nih an rin thu sawiin, hetihlai hian naupang mit tha lo zel tur ven nan phone khawih tlemtir chu invenna tha ber a nih thu an sawi bawk.
Nu leh pate pawhin kan fate hmalam hun thlir thiam chungin phone khawih chin tawk kan neihtir a tha hle.