MADC inthlan campaign tawp, MCC bawhchhia pathum dawng

Mara Autonoumous District Council (MADC) inthlanpui neih tura campaign theih hun chu nimin tlai dar 5 khan a tawp a, Siaha district election office-in election model code of conduct bawhchhia nia ngaih report pathum an dawng tawh.
MADC huam chhunga mipuiten an aiawh MDC thlang turin naktuk zing dar 7 atangin vote an thlak tawh dawn a, he inthlan atana campaign theih hun chu nimin tlai dar 5 khan tawpin, MADC huam chhunga vote nei lo campaigner-te chu Siaha chhuahsan vek tura hriattir an ni.
Siahaa chanchinbumite zawhna chhangin MADC inthlanpui atana Returning Officer, district election officer ni bawk, Lalsangliana chuan campaign hun hawn a nih chhungin harsatna liam tham sawi tur a awm a lo a, election model code of conduct bawhchhia nia report dawn pathum an neih thu leh chungte pawh chu an chin fel tawh thu a sawi.
Siaha SP VL Lura Hauzel pawhin inthlanna muanawm tak a awm theih nan theih tawp an chhuah thu sawiin, “Poling station 81 zinga paruk chu venhimna uluk bik ngaia puan a ni a, heng hmunte hi hmun dang aiin kan thuam tha bik,” a ti.
Inthlanpui tur atan Siaha police-te chu khawpui chhungah chhun leh zanah an duty tih a sawi a, tun dinhmunah chuan a ralmuanga a hriat thu a sawi a; inthlanpui danga inthlan dawna silai tun tih thin pawh tun tumah chuan tih a nih loh thu a sawi bawk.
Tar lan tawh thin angin MADC inthlanpui hi May 5, 2022 (Ningani)-ah neih a ni dawn a, zing dar 7 atanga tlai dar 4 thleng vote thlak hun hawn a ni anga, seat 25 awmah mi 85-in an chuh a. MNF in seat awm zawng zawng an chuh a, BJP-in seat 24, ZPM-in seat 8 leh independent candidate 4 an awm bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427