Naupang pahnihin Tripura Chief Minister Biplab Kumar Deb-a hnena tanpuina an dil lai video a darh chiam hnuah naupang lam buaipuitute che chhuak nghalin heng naupangte hnenah hian an mamawh angte an ngaihtuahsak.
Heng naupangte hi Tripura-a Sepahijala district, Bishalgarh-a Kalitila venga chengte an ni.
An pa, Alak Debnath chu Covid-19 avangin a thi nia sawi a ni.
Debnath-a hi an chhungkaw ei zawngtu a ni a, a thih tak avang hian an buai hle a, chhuanchhamin an awm zui ta a ni.
Chief minister hnena puih an dil lai video a darh atang hian Childline thuneitute chuan Thawhtanni khan Bishalgarh-a an chenna inah an zawng chhuak.
Pawisa eng emaw zat an pe a, lehkha an zirna tur an ngaihtuahsak dawn bawk.
Childline thuneituten naupang pahnih an zawn chhuahnaah hian an chennaa mi langsar tak, Sepahijala district-a agri-assistant committee hruaitu, Shanatan Debnath leh BJP hruaitu, Tapan Das an tel.
Hetih lai hian chief minister hnenah hian zirlai mangang pawhin Facebook page-ah puih a ngaih thu video-in a dah bawk.
He zirlai hi Maheshkhala, West Tripura district-a cheng niin Deb hi Covid-19 damlo buaipuina turin puih a dil a ni.
Deb pawhin video a hmuh hian thuneitute hnenah bawhzui tura hriattirin, zirlai chhungte hi ei leh in tur, damdawi leh a nu enkawlna tur thil dang bakah lehkha zirna tur dawhkan a pektir a ni.