Inkhawmpui hi min tichaktu leh mi tiharhtu ni mawlh thei se
Mizoram a kohhran member ngah ber Presbyterian kohhran hnuaia Thalai Pawl intelkhawmna Kristian Thalai Pawl (KTP) General Conference chu nizan khan tiakin, palai kalten tisa leh thlarauah hlawkna an chhar nasat thu an sawi nasa hle.
Kolasib-a KTP khawmpui lian neihah hian thu leh hlaa sawtpuina tur hrang hrang a tam hle a, speaker thusawi phei chuan nghawng a nei lianin, sawizui leh TV lama lo thlirtute thlengin sawizui an tam hle.
Hengte min tichaktu leh mahni inenfiah nan hmang thei ila, thalai kalkhawmte pawh hian speaker thusawi leh sermon hrang hrangte pawh inkhawmpuia tawp nghal mai lovin, mahni kohhran leh khua kan thlen hun theuhah inenfiah chungin, a taka hman nghal tum thei ila a va tha dawn em.
Ram rorelna leh sumdawnna kaihhnawihah te hian kan khawmpuia thu ngaihthlak hmangtein infuihin, inenfiah thei ila, keimahni hnathawhna leh eizawnna theuhah hlawkna chharin, midangte entawn leh kawhhmuhtu ni theuh thei ila khawmpui hlawhtling a va ni thei zual dawn em.
Hri lengin hun reife min bawhbuai hnu leh nunphung pangngaia kal theih a nih lawk loh laia inkhawmpui duhawm neih a ni thei leh tate hi a lawmawm a, kan hmalam hun zelah pawh Pathian khawngaihna dawng tlaka nungin, thalaite leh mitin mai hian kan nun uluk ila, kan Pathian thu hriat leh hla hmanga rawngbawlnate zawmin, khawmpui hmangtu leh chhimtu bakah in lam atanga thlir zawng zawngte pawhin nun thar i nei mawlh teh ang u. Inkhawmpui hlawhtling kan hmang a ni mai dawn si a.