Border Security Force (BSF) Inspectors General-te leh Border Guards of Bangladesh (BGB) Region Commander-ten ramri chungchanga inbiakna, border coordination conference an neih chu Thawhtanni khan Agartala-ah Video Tele Conferencing (VTC) hmangin an tan.
Conference hian Ningani thleng a awh ang.
Bangladesh lai hi Tanveer Gani Chowdhury, BGB South-East Region-a additional director general chuan a ho va, BGB-a pawimawh tak tak dang an tel bawk.
BGB aiawhte bakah hian Bangladeshi foreign ministry leh home ministry aiawhte pawh conference-ah hian an tel bawk.
India lam hi BSF Tripura Frontier Inspector General Susanta Kumar Nath chuan a ho va. BSF Meghalaya Frontier Inspector General Hardeep Singh, BSF Mizoram & Cachar Frontier Inspector General Dinesh Kumar Boora leh BSF officer pawimawh dangten an tawiawm bawk.
Ram pahnih ramri vengtute inbiaknaah hian ramri vela sualna hrang hrang thleng thin te, ruihhlo leh phal loh thil dang tawlh thin te, Bangladesh lama India hel pawl chetla chungchang te, India pawisa lem leng vak chungchangte an sawiho dawn a ni.
Heng bakah hian Tripura-a Single Row Fence (SRF) siam chungchang leh ramria hmasawnna hna thawh mek tihkhawtlai chungchangte pawh an sawi bawk dawn.
Ramria inremna leh boruak ralmuang zawk a awm theih nana inpawh tawn taka thawhhona a awm theih dan tur hrang hrang an sawiho dawn bawk.