Russia-in thlawhna hmanga Ukraine khawchhak lam an beihnaa sikul an kah fuhah mi 60 vel an thih rin a ni a, sikul kang chim karah mi zawn hna thawh mek a ni.
Luhansk region governor, Serhiy Haidai chuan Russian sipaiten sikula bomb an thlak hnuah hian ruang pahnih lak chhuah tawh an nih thu leh civil mi 30 chu hima lak chhuah an nih thu a sawi bawk.
Haidai chuan Bilohorivka khuaa sikulah hian indona avanga an chenna in chhuahsan mi 90 chuang an awm khawm niin a sawi a. Inrinnia an awmna kah a nih hnuah hian a kang zui ta niin a sawi.
“Darkar li dawn hnuah kang hi kan thelh mit thei chauh va, a ruhrelte then a ni a, vanduaithlak takin ruang pahnih kan hmu,” tiin Haidai hgian Telegram messaging app-ah a tar lang.
“Mi 30 chu a chim kar atang hian hmun hima lak chhuah an ni a, an zinga mi pasarih chuan hliam an tuar a. A chim karah hian mi 60 vel an awm ngei a rinawm hle,” a ti bawk.
Luhansk sipaiten video an tihchhuahah chuan emergency services miten sikul building kang leh chim chhia an senghawi lai tihlan a ni.
Video-ah hian tu nge a nih hriat loh pakhat chuan, “Mi dangte hi chu dam chhuak an awm a beiseiawm loh. Bomb thlakna avanga khuar thla hian sikul in hnuai ber thleng a thleng phak a, a rapthlak hle,” tia a sawi pawh a lang.
Steel plant-a inbeihna kal zel
Ukraine leh khawthlang ramte chuan Russian sipaite hian civil mite pawh an bei a, dan an bawhchhia niin an puh a, Moscow erawh chuan a hnial ve thung.
Tun hnaiah ram pahnihte inbeihna ber hi Ukraine khawchhak lam niin heng hmunah hian ram zau an tum a, an chân tawhte lak kir an tum bawk.
Moscow hi Donbas-ah an che ber a, hei hi inlak hran tum pawl, an lo puih sa reng tawhte kum 2014 atanga Ukraine an lo do tawhna a ni.
Khawchhak lama inbeihnaah eng nge thil thleng chiah hriat a har hle a. Thlawhna atanga inkah leh laipuia inralsai a awm reng avangin chanchinbumite tan pawh chhuah ngam a ni lo.
Russia-in chawlhkar 10 zet Ukraine a rûn tawhah hian mi sang tel an thi tawh a, khawpui chhia tam tak awmin Ukrainian maktaduai nga velin an ram an tlanchhiatsan tawh.
An lo thunun tawh, lawngchawlhna khawpui, Mariupol-ah chuan steel siamna hmunpuia civil mi tangkhang 300 chuag chu Inrinni khan lak chhuah an ni ta bawk.
Factory-a Ukrainian fighter la awmte chuan inpek an tum mai lo va, Russian sipaite hian Thawhtannia Moscow khawpuia Victory Day an lawm tur ruala he steel plant lian tak hi thunun an hman tumin an bei ve thung.
Soviet hun laia mi tawh, Azovstal steel mill hi he khawpuia Ukrainian sipaiten hmun an neih chhun a ni tawh a ni.