Kartawp hmang nuam ber pawl an ni awm mai mange! Bollywood star Katrina Kaif leh Vicky Kaushal te nupa thlalak hian instagram lamah sawi hat hat a tling a, social media platform a ti lum hat hat mai.
Swimming pool-a Kaif-i’n duat tak maia Vicky a kuah lai thlalak hi “Me and mine 🤍🤍” tiin caption fuhzet nen a phochhuak.
Fan te leh milar tak takte’n comment section lamah luh an inchuh a ni deuh ber a, serious angreng taka Vicky lan dan phei hi chuan online community a ti ‘hot’ viau bawk.
Priyanka Chopra-i’n heart eyes emoticon a pek laiin, Hrithik Roshan chuan, ‘So Nice’ tiin a comment a, American actor Kornin Miles pawhin, ‘goals’ a ti a ni.
Anni nupa hi December 8 khan langsar lem lo takin Rajasthan-ah an inkutsuaih.
Tunah hian hmachhawp film langsar tak tak an nei dun mek a; Kaif hi ‘Sooryavanshi’, ‘Marry Christmas’, ‘Tiger 3’ leh ‘Phone Bhoot’ ah te a hmel kan hmu thei dawn a. A pasal Vicky pawh hi ‘Sam Bahadur’ leh ‘The Immortal Ashwattharna’ ah a inlan bawk ang.
Vicky hi Bollywood-ah ke a nghahna a la rei lem loh laiin, Kaif erawh hnuhma lian tham leh ropui tak tak a hnutchhiah tawh a, kum 15 chuang inlan tawh a ni. Thawkkhat lai phei kha chuan ‘Queen of Bollywood’ tih hial khawpin a inlanna film a hit bakah mimal tak pawhin a lar fal hle.