Aizawl: Mizoram Legislative Assembly kum 50 tlin lawmna kal zelah nimin chawhnu khan Assembly House Annexe Conference Hall-ah Legislators’ Joint Meeting neih a ni a, Speaker Lalrinliana Sailo-in a kaihruai a ni.
Chief Minister Zoramthanga chuan Mizoram Legislative Assembly Speaker hmasa ber, Dr. H. Thansanga hnenah chawimawina thilpek a hlan a. Deputy Chief Minister Tawnluia’n speaker palina, Dr. Kenneth Chawngliana chu chawimawina thilpek a hlan bawk a. Deputy Speaker Er. Lalrinawma’n speaker lo ni tawh leh minister ni mek, Lalchamliana hnenah chawimawina thilpek a hlan a. Parliamentary Affairs Minister T.J Lalnuntluanga’n R. Romawia hnenah chawimawina thilpek a hlan bawk.
Deputy CM-in Golden Jubilee souvenir a tlangzarh.
Legislator hmasa ber zinga pathum tel – Chawngkunga, K. Sangchum leh Sapliana Vandir te hnenah chawimawina hlan a ni bawk.
FLAM aiawhin an President Liansuama’n thu sawiin Mizoram Legislative Assembly Golden Jubilee lawmnaah a lailum lai ber duhsak taka an chantir thin avangin lawmthu a sawi a, FLAM member 97 an awm thu a tar lang bawk.
He hunah hian kum 1972 atanga kum 2022 inkara legislator lo ni tawh leh ni mekten hun an hmang a ni.