Aizawl: Aizawl South II bialtu MLA Lalchhuanthanga’n Aizawl Bazarpui Aizawl City Centre Annexe tia a sak that hna, October 4, 2018 atanga tan, kum thum chhûnga zawh tura ruahman tun thlenga la zawh loh chu, “Bazar-a eizawngte ngaihthahna leh mipui zah lohna lian tak a ni,” a ti.
Bazar sak that chuan chhungkaw 2,000 chuang eizawnna a tibuai tih sawiin, Lalchhuanthanga chuan, “Sak zawh hun tura tih kum thum leh a chanve a liam hnuah pawh sak zawh chu sawi loh, hna za-a 35 chauh zawh a la ni,” a ti a. Bazar sak that hna muan chhanah hripui puh lo tura sorkar ngenin, “Hripui len lai pawha airport cute sak hna Kamrul-a hnena cheng vaibelchhe tam tak man pe theitu sorkar hian, mipuite mamawh em em Aizawl Bazarpui sakna tur sum zawng zawng hi K. deposit-ah a dah thung a ni tih hi Zoram mipuite hriatah ka puang duh a ni, hei baka mipuite harsatna ngaihthahna hi a awm thei tawh lo vang,” a ti.
Bazara eizawngten dan pangngaia ei an zawn leh thuai theihna tura Aizawl City Centre Annexe sak hna chu chak taka kalpui turin MNF sorkar a phut tih Aizawl South II bialtu MLA chuan a sawi bawk.